ԵՐԵՎԱՆ, 19 հուլիսի – Sputnik. Ամերիկյան Google ընկերությունը կիբեռհարձակումների վտանգը նվազեցնելու համար որոշ աշխատակիցների աշխատանքային համակարգիչների վրա կսահմանափակի ինտերնետի հասանելիությունը։ Այս մասին երեքշաբթի հայտնել է ՏԱՍՍ–ը` հղում անելով CNBC հեռուստաալիքին։
Հեռուստաալիքի տվյալներով` ընկերությունն այսօր փորձնական ծրագիր կգործարկի, որի շրջանակում որոշ աշխատակիցներ հասանելիություն կունենան միայն կորպորատիվ վեբ գործիքներին կամ Google–ի արտադրանքին, մասնավորապես` Google Drive վիրտուալ պահեստարանին և Gmail էլեկտրոնային փոստին։ Ընկերության փաստաթղթերում ասվում է, որ այս ծրագիրը կնվազեցնի հաքերների հարձակումների վտանգը։
«Google–ի աշխատակիցները հաճախ կիբեռհարձակումների օբյեկտ են դառնում»,– ասվում է Google–ի փաստաթղթերից մեկում։ Ընկերությունում հեռուստաալիքին պատասխանել են, որ իրենք ժամանակ առ ժամանակ ուսումնասիրում են վնասակար հարձակումների դեմ ներքին համակարգերի ուժեղացման եղանակները։ Ընկերությունում պարզաբանել են, որ եթե աշխատակցի սարքի վրա հարձակում իրականացվի, չարագործները կկարողանան հասանելիություն ստանալ ենթակառուցվածքային կոդին և օգտատերերի տվյալներին։
CNBC–ը հայտնում է, որ Google–ի ղեկավարությունն ի սկզբանե 2.5 հազար աշխատակից է ընտրել ծրագրին մասնակցելու համար, սակայն արձագանքները ստանալուց հետո որոշել է, որ ծրագրին միայն կամավորները կմասնակցեն։