Երևանում` Ֆրանսիայի դեսպանատան առջև, մի խումբ քաղաքացիներ բողոքի ակցիա են իրականացնում ի պաշտպանություն Արցախի։ Նրանք պահանջում են Ֆրանսիայից` իբրև ԵԱՀԿ Մինսկի խմբի համանախագահող երկիր, գործի դնել Արցախի ինքնորոշման իրավունքի իրացման հարցը։
«Բացեք կյանքի ճանապարհը», «Ոչ Արցախի շրջափակմանը», «Մենք Արցախն ենք». նման ցուցապաստառներով և վանկարկումներով մի քանի տասնյակ երեխաներ են նաև բողոքի ակցիային մասնակցում։ Նրանք բոլորը «Դիզակ» արտմշակութային կենտրոնի սաներն են, որոնց ընտանիքները ևս ստիպված եղան լքել իրենց տները ադրբեջանական օկուպացիայից հետո։
«Այն, որ մենք այսօր կանգնած ենք այստեղ, և մեր երեխաները պահանջներ են ներկայացնում, բացատրվում է նրանով, որ մենք ողջունում ենք բոլոր կոչերը, այդ թվում նաև հարգարժան պարոն Մակրոնի հայտարարությունները, սակայն Ֆրանսիան` որպես ՄԱԿ–ի ԱԽ մշտական անդամ, Ադրբեջանի, նրա ցեղասպանական և ահաբեկչական գործունեության համար պետք է բարձրացնի ղեկավարության հանդեպ պատժամիջոցներ անհապաղ կիրառելու հարցը»,– նշեց ակցիային մասնակցող ՀՀ նախկին ՄԻՊ Լարիսա Ալավերդյանը։
Նա շեշտեց` խոսքը հենց ղեկավարության, այլ ոչ թե ժողովրդի հանդեպ պատժամիջոցներ կիրառելու մասին է։
Բողոքի ակցիայի մասնակիցները պնդում են` Արցախը չի եղել և չի լինելու Ադրբեջանի կազմում։
Հուլիսի 17-ին քաղաքացիների այս խումբը բողոքի ակցիաներ է իրականացրել նաև Հայաստանում ՄԱԿ–ի գրասենյակի, ապա նաև Ռուսաստանի դեսպանատան առջև։
Նշենք, որ հուլիսի 14–ից Ստեփանակերտի Վերածննդի հրապարակում մեկնարկել է համաժողովրդական շարժումը, որի մասին հուլիսի 13–ի ուշ երեկոյան հայտարարել էր Արցախի պետնախարար Գուրգեն Ներսիսյանը։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։