Ստեփանակերտի Վերածննդի հրապարակում մեկնարկեց համաժողովրդական շարժումը, որի մասին հուլիսի 13–ի ուշ երեկոյան հայտարարել էր Արցախի պետնախարար Գուրգեն Ներսիսյանը։
Համաժողովրդական շարժումը սկսվեց հայրենիքի պաշտպանության համար հերոսաբար ընկածների հիշատակը մեկ րոպե լռությամբ հարգելով և տերունական աղոթքով։
Հանրահավաքին մասնակցում են նաև Արցախի Հանրապետության նախագահ Արայիկ Հարությունյանը, պետական նախարար Գուրգեն Ներսիսյանը, Ազգային ժողովի նախագահ Արթուր Թովմասյանը, պաշտոնատար այլ անձինք։
Արցախցիները հավաքվել են` միջազգային հանրությանը ներկայացնելու Արցախի դրությունը:
«Մենք վերջապես պետք է հասկանանք, որ մեր թշնամու համար բացարձակապես նշանակություն չունի մեր քաղաքական նախասիրությունները, կուսակցական պատկանելիությունը, կրոնական դավանական հայացքները, ընդհանրապես ոչ մի բան նշանակություն չունի, մեզ ցանկանում են վերացնել որպես տեսակ և բռնազավթել մեր հայրենիքը, իսկ մեր մնացորդը լավագույն դեպքում պետք է վերածվի աշխարհով մեկ սփռված նորօրյա գնչուների՝ զուրկ արմատներից, հայրենիքից ու ազգային արժանապատվությունից»,- հանրահավաքի մեկնարկին ասաց Տեր Ներսես քահանա Ասրյանը։
Պետնախարար Գուրգեն Ներսիսյանն էլ իր ելույթում ընդգծեց, որ զիջելու, լքելու Արցախ չունեն, Արցախում ապրելը ոչ թե իրավունք, այլ պարտականություն է:
«Սա գրված ու չգրված օրենք է, սա երդում ու պատասխանատվություն է: Եվ ուրեմն, բոլորս մեկ մարդու պես սկսում ենք մեր գոյության պահպանման, մեր համազգային իրավունքների պաշտպանության համաժողովրդական խաղաղ պայքարը»,- նշեց նա։
Վերածննդի հրապարակում անցկացրած հանրահավաքից հետո արցախցիները երթով շարժվեցին Կարմիր խաչի գրասենյակի մոտ, նրանք պատրաստվում են հասնել ՌԴ խաղաղապահների կենտրոնակայան։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։