ԵՐԵՎԱՆ, 11 հուլիսի - Sputnik. Արցախում գտնվող ավելի քան 186 բուժառուներ սպասում են իրենց տեղափոխությանը Հայաստանի Հանրապետության մասնագիտական բժշկական կենտրոններ՝ անհապաղ բուժօգնություն ստանալու համար: Տեղեկությունը հայտնում է Արցախի առողջապահության նախարարությունը։
Ավելի վաղ հայտնել էինք, որ Ադրբեջանի սահմանապահ ծառայությունը կրկին արգելափակել է Լաչինի միջանցքը՝ դա բացատրելով ԿԽՄԿ մեքենաներում «մաքսանենգ» ապրանքի հայտնաբերմամբ։
«Ադրբեջանը կրկին արգելափակել է Կարմիր խաչի միջազգային կոմիտեի կողմից առողջական ծանր խնդիրներ ունեցող արցախցի բուժառուների տեղափոխումը Հայաստանի Հանրապետություն, ինչպես նաև բուժառուների վերադարձը դեպի Արցախ»,–ասվում է հայտարարության մեջ։
Նշվում է, որ «Արևիկ» բուժմիավորումում այս պահին ստացիոնար բուժում է ստանում 33 երեխա, 4-ը գտնվում է նորածնային և վերակենդանացման բաժանմունքում:
Բացի այդ, «Հանրապետական բժշկական կենտրոն» ՓԲԸ-ում ստացիոնար բուժում է ստանում 102 հիվանդ, 5 բուժառու գտնվում է վերակենդանացման բաժանմունքում, նրանցից 2-ը ծայրահեղ ծանր վիճակում են։
Արցախի Հանրապետության առողջապահության նախարարությունից վստահեցնում են, որ ձեռնարկում են հնարավոր բոլոր միջոցները ստեղծված իրավիճակի կարգավորման ուղղությամբ՝ բանակցելով Կարմի խաչի միջազգային կոմիտեի հետ։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախի շրջափակման 212 օրվա ընթացքում արդեն 182 օր շարունակ խափանված է Հայաստանից Արցախ էլեկտրամատակարարումը։ Հուլիսի 9-ին ադրբեջանական կողմը անջատել է նաև Արցախի գազամատակարարումը: