ԵՐԵՎԱՆ, 5 հուլիսի – Sputnik. «Գոյ» թատրոնը չի փակվելու առնվազն մինչև դատական ակտի կայացումը։ Այսօր հրավիրված ասուլիսում հայտարարեց թատրոնի ներկայացուցիչ, փաստաբան Կարո Ասատրյանը։
Մայիսի 11–ին ՀՀ կառավարությունը որոշում կայացրեց, որով «Գոյ» թատրոնը միացվեց Գ. Սունդուկյանի անվան ազգային ակադեմիական թատրոնին։ Ավելի ուշ հայտնի դարձավ, որ «Գոյը» դատարանում վիճարկում է կառավարության որոշումը։
Կարո Ասատրյանի խոսքով` «Արմեն Մազմանյանի անվան բեմարվեստի ազգային փորձարարական «Գոյ» կենտրոն» ՊՈԱԿ–ի հայցադիմումն ընդդեմ ՀՀ կառավարության՝ 2023 թվականի մայիսի 11-ի որոշումն անվավեր ճանաչելու պահանջի մասին, ընդունվել է վարույթ, և վարչական դատավարության օրենսգրքի 83–րդ հոդվածի 1-ին մասով կասեցվում է վիճարկվող վարչական ակտի կատարումը:
«Որևէ պետական պաշտոնյա չի կարող իր ցանկություններով առաջնորդվել և թատրոն փակել։ Կառավարությունն առնվազն չի հիմնավորել, թե ինչու է ուզում «Գոյ» թատրոնը փակել»,–ասաց Ասատրյանը։
Նա նշեց, որ դեռ դատական նիստի օրը հայտնի չէ, դա կարող է նշանակվել օրինակ 6 ամիս հետո, բայց մինչ այդ թատրոնն իր բնականոն ռիթմով պետք է աշխատի, և գույքի հանձնում չի կարող տեղի ունենալ։
«Գոյ» թատրոնի գեղարվեստական ղեկավար, բեմադրիչ Արթուր Սահակյանն էլ իր հերթին նշեց, որ իրենք աշխատում են, չեն փակվելու, և արդեն պատրաստ է հուլիսի խաղացանկը։
Հիշեցնենք` «Գոյը» Սունդուկյանի թատրոնին միացնելու որոշման նախագիծը ներկայացրել էր ԿԳՄՍ նախարարությունը`որպես հիմք նշելով, որ «Գոյ» կենտրոնը 2022թ․ 3 մլն 436 հազար 990 դրամով թերի է կատարել տարեկան ֆինանսական պլանը: Բացի այդ, հրավիրված բեմադրիչների կողմից ներկայացումներ չեն բեմադրվել, կենտրոնը չի համագործակցել ԿԳՄՍ նախարարության հետ և այլն: