ԵՐԵՎԱՆ, 23 հունիսի – Sputnik. 27-ամյա երիտասարդը Երևանում վարձակալությամբ բնակարաններ տրամադրելու և այլ պատրվակներով ՀՀ և ՌԴ երկու տասնյակից ավելի քաղաքացիներից 14 մլն դրամ է հափշտակել։ Տեղեկությունը հայտնում է ՀՀ քննչական կոմիտեի մամուլի ծառայությունը։
Պարզվել է, որ 2021թ. մարտից 2022թ. նոյեմբեր ընկած ժամանակահատվածում նա համացանցի տարբեր էջերում տեղադրել է վարձակալությամբ բնակարաններ տրամադրելու վերաբերյալ հայտարարություններ։ Դրանց կցել է համացանցից հավաքագրված տարբեր բնակարանների լուսանկարներ։ Արդյունքում նրա հետ կապ են հաստատել ՀՀ–ի ու հատկապես ՌԴ–ի ավելի քան երկու տասնյակ քաղաքացի և բնակարան վարձելու ցանկություն հայտնել։
«27-ամյա երիտասարդը վերջիններիս ներկայացել է որպես Երևան քաղաքի Հյուսիսային պողոտայում, Բուզանդ և Աբովյան փողոցներում գտնվող բնակարանները վարձակալության հանձնելու իրավասություն ունեցող անձ։ Բնակարանները նրանց վարձակալությամբ հանձնելու պատրվակով պահանջել և փոխանցման եղանակով՝ որպես նշված բնակարանների վարձակալության կանխավճար, ստացել է խոշոր չափերի գումարներ՝ ընդհուպ մինչև շուրջ 2 մլն դրամին համարժեք արտարժույթ»,– տեղեկացնում են ՔԿ–ից։
Երիտասարդը վերցրել է գումարներն ու անհետացել։
Պարզվել է նաև, որ 27-ամյա երիտասարդը շահավետ պայմաններով տարադրամ փոխանակելու վերաբերյալ հայտարարություն է տեղադրել համացանցում` թիրախում ունենալով ՌԴ–ից Հայաստան տեղափոխվող քաղաքացիներին։ Նրա հետ կապ հաստատած քաղաքացիները երիտասարդի բանկային հաշվին փոխանցել են ՌԴ արտարժույթ, սակայն նա խոստացված գումարը չի փոխանցել քաղաքացիներին ու կրկին անհետացել է։
Երիտասարդը խարդախության այլ մոդելներ էլ է գործարկել, օրինակ` խոստացել է համատեղ բիզնես գործունեություն իրականացնել, «Iphone 13 Pro» մոդելի բջջային հեռախոս վաճառել և այլն։
Նրա հանցավոր գործողություններից տուժել է ՌԴ 22 քաղաքացի և ՀՀ 4 քաղաքացի։ Նրանց պատճառված ընդհանուր գումարային վնասը կազմել է ավելի քան 14 մլն դրամ։ Նախաքննության ընթացքում վերականգնվել է 2 միլիոնից քիչ ավելին։
Ձեռք բերված բավարար փաստերի հիման վրա 27-ամյա երիտասարդին մեղադրանք է ներկայացվել խարդախության համար։
Նախաքննությունն ավարտվել է: Քրեական վարույթի նյութերն ուղարկվել են հսկող դատախազին։