ԵՐԵՎԱՆ, 21 հունիսի – Sputnik. Զանգեզուրի պղնձամոլիբդենային կոմբինատի (ԶՊՄԿ) անվտանգության աշխատակցին սպանելու մեջ մեղադրվող ադրբեջանցի զինծառայող Հուսեյն Ախունդովը դատապարտվեց 20 տարվա ազատազրկման։ Տեղեկությունը Sputnik Արմենիային հաստատեց ՀՀ գլխավոր դատախազության մամուլի ծառայությունը։
Դատավոր Նապոլեոն Օհանյանը կարդում է դատավճիռը
© Photo : Screenshot / Syuniq TV
Որոշումը հրապարակել է Սյունիքի մարզի առաջին ատյանի դատարանը։ Դատավոր Նապոլեոն Օհանյանը բավարարել է դատախազ Մովսես Անտոնյանի պահանջը` դատապարտել Հուսեյն Ախունդովին 20 տարի ազատազարկման։
Հուսեյն Ախունդովը մեկն է այն երկու ադրբեջանցի զինծառայողներից, որոնք ապրիլի 7-ին Նախիջևանի կողմից ապօրինի հատել էին Հայաստանի սահմանը։
Ըստ քրեական գործի նյութերի` ապրիլի 12-ին Ախունդովը, իր մոտ եղած ինքնաձիգով կրակել է ԶՊՄԿ-ի աշխատակից Հայրապետ Մելիքսեթյանի վրա և սպանել նրան։
Դեպքից հետո նա գողացել է սպանվածի հեռախոսը, տեսաուղերձ նկարել և ներբեռնել սոցիալական ցանցի իր էջում։ Ադրբեջանցին փորձել է գողանալ նաև տուժողի մեքենան և փախուստի դիմել Իրան, բայց դա նրան չի հաջողվել։
Դեպքի հաջորդ օրը Սյունիքի մարզի Աճանան գյուղի մոտ բնակիչները նկատել են Հուսեյն Ախունդովին, վնասազերծել ու հանձնել իրավապահներին։