Զրահաբաճկոն ու սաղավարտ հագած, «Ոչ բռնությանը» գրությամբ ցուցանակներով փաստաբաններն բողոքի ակցիա են իրականացնում ոստիկանության շենքի դիմաց։
Հիշեցնենք, որ փաստաբանները բողոքի ակցիաներ են սկսել այն դեպքից հետո, երբ ոստիկանության բաժանմունքում ծեծի էր ենթարկվել փաստաբան Կարեն Ալավերդյանը։
«Այս սաղավարտները ոստիկաններից հարվածներից պաշտպանում է: Վատ վերաբերմունք միշտ էլ եղել է, բայց չենք բարձրաձայնել: Այսպես ինձ որոշ չափով պաշտպանված եմ զգում»,- ասաց զրահաբաճկոն հագած փաստաբանը։
«Ոչ բռնությանը». զրահաբաճկոն ու սաղավարտ հագած փաստաբանները ոստիկանության շենքի մոտ են
© Sputnik / Aram Nersesyan
Փաստաբանները գրավոր պահանջ ներկայացրեցին ՆԳՆ նախարար Վահե Ղազարյանին, որին երկու օրվա մեջ միացել է 878 փաստաբան։ Նրանք պահանջում են՝ փաստաբանների նկատմամբ բռնություն գործադրած ոստիկանների լիազորությունները դադարեցնել:
Հիշեցնենք, որ երեկ նրանք դատախազ Աննա Վարդապետյանին նվեր էին տարել կարմիր ժապավենով հեռուստացույց, քանի որ դատախազը հայտարարել էր, թե տեղյակ չէ փաստաբանների նկատմամբ բռնությունների դեպքերին։
Իսկ ավելի վաղ նրանք փաստաբանների պալատի շենքից երթ իրականացրեցին դեպի ԵՄ գրասենյակ՝ տեղեկացնելով, որ «ԵՄ տրամադրած գումարները ծախսվում են փաստաբանների դեմ բռնության նպատակով»։
Նշենք, որ հունիսի 7-ին ոստիկանները բռնություն էին կիրառել և ձերբակալել փաստաբան Կարեն Ալավերդյանին` ամբաստանյալին ծեծից պաշտպանելու փորձի ժամանակ։ Սա փաստաբանների նկատմամբ բռնություն կիրառելու առաջին դեպքը չէ։ Նախորդ անգամ էլ ոստիկանության Էրեբունու բաժնում առերես հարցաքննության ժամանակ փաստաբանական պալատի երկու փաստաբաններին ոստիկանները նախ հայհոյել, այնուհետև ծեծի էին ենթարկել։