ԵՐԵՎԱՆ, 20 հունիսի - Sputnik. Հայաստանում արտադրվող և ներմուծվող պաղպաղակի արտադրատեսակներում արձանագրվել են սահմանված իրավական նորմերի խախտումներ։ Այս մասին տեղեկանում ենք ՀՀ սննդամթերքի անվտանգության տեսչական մարմնի ֆեյսբուքյան էջից։
Մակնշման անհամապատասխանություններ են հայտնաբերվել, մասնավորապես, «Գրանդ Քենդի» ՍՊԸ արտադրության «Classic» պաղպաղակի մակնշվածքում, որտեղ բացակայել է ռուսերեն մակնշումը, իսկ «Դելիկասա»ՍՊԸ–ի կողմից ներմուծվող «ICL Gravity» պաղպաղակը չի ունեցել հայերեն մակնշում, «Շոկոլադային պաղպաղակ պլոմբիր»-ի վրա բացակայել է պահպանման ժամկետը։
«Թամարա ՍՊԸ արտադրության «Rockn Roll», «bubble GUM», «СССР», «Magic Cone, «Ալիք» պաղպաղակների փաթեթավորման վրա անընթեռնելի է արտադրման օրը, ամիսը, տարին։ «Պաղպաղակ կոն շոկոլադե» տեսակի պատրաստման ամսաթիվը դրոշմված է սննդամթերքի բաղադրության վրա, որի պատճառով անընթեռնելի է և՛ պատրաստման օրը, և՛ բաղադրությունը»,–ներկայացվում է հաղորդագրությունում։
«Դուստր Մարիաննա» ՍՊԸ արտադրության «ԲՈՆՄԱՐԻ» վանիլային վաֆլե գլանակների, «ԻԳԻԹ» ՍՊԸ արտադրության «Պաղպաղակ վանիլային տոնական» տեսակի պաղպաղակների վրա ընթեռնելի չեն եղել արտադրման ժամկետը, իսկ «Յուրմենշին» ՍՊԸ արտադրության «Պաղպաղակ ընտանեական մրգային» տեսակի պիտակի վրա արտադրման ժամկետի մակնշումը։
Նշված արտադրատեսակների իրացումը կասեցվել է, և տրվել են խախտումները վերացնելու հանձնարարականներ։
Միևնույն ժամանակ նշվում է, որ «ԻԳԻԹ» ՍՊԸ-ի կողմից արտադրվող «Պաղպաղակ կապուչինո պլոմբիր» և «Յուրմենշին» ՍՊԸ-ի կողմից («էլիտ Շանթ») արտադրվող «Պաղպաղակ վանիլային պլոմբիր» արտադրատեսակների անվանման մեջ մակնշված է «պլոմբիր», սակայն բաղադրության մեջ նշված է, որ օգտագործվել է կաթնային ճարպի փոխարինիչ։
Իսկ «Փինք Բերրի» ՍՊԸ-ի կողմից արտադրված պլոմբիր տեսակի «Վանիլային պաղպաղակ թխվածքաբլիթով» և «Պաղպաղակ քոթոթ» արտադրատեսակներում հայտնաբերվել է կաթնայուղի փոխարինիչ։
Վերոնշյալ 3 կազմակերպություններում՝ «ԻԳԻԹ», «Յուրմենշին» և «Փինք Բերրի» ՍՊԸ-ներում, այժմ իրականացվում է պետական վերահսկողություն՝ ստուգում: