ԵՐԵՎԱՆ, 19 հունիսի – Sputnik. Փաստաբանները կարմիր ժապավենով հեռուստացույց են նվեր բերել գլխավոր դատախազ Աննա Վարդանյանին։ Դատախազության շենքի մոտ, որի մուտքը շրջափակված էր ոստիկանության աշխատակցիներով, ճեպազրույցի ժամանակ փաստաբան Վարազդատ Հարությունյանը նշեց, որ դա խորհրդանշական նվերն է` ընդդեմ փաստաբաններին բռնության ենթարկելու` գլխավոր դատախազի դրսևորած անտարբերության:
Նշենք, որ հունիսի 7-ին ոստիկանները բռնություն էին կիրառել և ձերբակալել փաստաբան Կարեն Ալավերդյանին` ամբաստանյալին ծեծից պաշտպանելու փորձի ժամանակ։ Սա փաստաբանների նկատմամբ բռնություն կիրառելու առաջին դեպքը չէ։ Նախորդ անգամ էլ ոստիկանության Էրեբունու բաժնում առերես հարցաքննության ժամանակ փաստաբանական պալատի երկու փաստաբաններին ոստիկանները նախ հայհոյել, այնուհետև ծեծի էին ենթարկել։
«Երբ դատախազին ԱԺ–ում հարց ուղղվեց, թե ինչ առաջընթաց կա փաստաբանների նկատմամբ բռնության դեպքի քննությունից, նա ասել էր, որ չի հետևել, նման դեպքից տեղյակ չէ։ Հիմա հեռուստացույց ենք նվեր բերել, որպեսզի նա հետևի ՀՀ–ում տեղի ունեցածին։ Այս հեռուստացույցը բացի Հ1–ից, նաև այլ ալիքներ էլ է հեռարձակում, որի շնորհիվ դատախազն արդեն տեղյակ կլինի, որ մեր երկրում փաստաբանների նկատմամբ բռնության դեպքեր են տեղի ունենում»,– հայտարարեց Հարությունյանը։
Ըստ նրա` պետք չէ կամուրջներն այրել փաստաբանների հետ, քանի որ հեռու չէ այն օրը, երբ փաստաբանների կարիք նաև նրանք են ունենալու։ Վարազդատ Հարությունյանը համոզված է` սրա դեմն առնել է պետք, քանի որ սա բռնապետացման ուղիղ ճանապարհն է։
Փաստաբանների ակցիան կարճ տևեց։ Դատախազության մուտքը հսկող ոստիկանության աշխատողները, ըստ փաստաբանների, խոստացան հեռուստացույցը փոխանցել գլխավոր դատախազին։