Ռուսական Ուրայն ու Սեստրորեցկը և հայկական Մեղրին ու Գորիսը քույր քաղաքներ կդառնան

ԵՐԵՎԱՆ, 16 հունիսի – Sputnik. Ռուսական Ուրայ և Սեստրորեցկ քաղաքները և Մեղրին ու Գորիսը քույր քաղաքներ կդառնան։ Համապատասխան համաձայնագրեր կնքելու մտադրության մասին արձանագրությունն այսօր ստորագրվեց Կապանում քաղաքների վարչակազմերի ներկայացուցիչների միջև։ Տեղեկությունը հայտնում է Sputnik Արմենիայի թղթակիցը։

Արձանագրությունը ենթադրում է ճանապարհային քարտեզի և միջոցառումների պլանի ստեղծում, որոնք կողմերը պետք է իրականացնեն մինչ համաձայնագրի կնքումը։ Ակտիվ աշխատանքներ են ընթանում քաղաքների միջև կապեր հաստատելու ուղղությամբ:

Սեստրորեցկի վարչակազմի ղեկավար Անդրեյ Իվանովը Sputnik Արմենիայի թղթակցի հետ զրույցում կարևորեց Գորիս համայնքի ղեկավարի տեղակալ Արտյոմ Աղաջանյանի հետ ստորագրված փաստաթուղթը։

Նրա խոսքով՝ երկու քաղաքներն էլ հպարտանալու և ցուցադրելու բան ունեն։ Իվանովը հիշեցրեց, որ Սեստրորեցկը «Սանկտ Պետերբուրգի թոքեր» են անվանում։ Ֆինլանդիայի ծոցի ափին գտնվող քաղաքում զարգացած է առողջարանային հանգիստը։

Ուրայ քաղաքի ղեկավար Թիմուր Զակիրզյանովն իր հերթին նշեց, որ քույր քաղաքներ դառնալու մասին համաձայնագիր է կնքել իր մրգերով, մեղրով, արևով հայտնի Մեղրիի հետ:

«Սա համագործակցության ևս մեկ ուղղություն է, եթե հնարավորություն լինի այս ամենը ներկրել, մենք կարող ենք Ուրայում «Մեղրիի պարգևներ» խանութ բացել։ Բացի այդ, հնարավոր են մշակութային փոխանակման տարբերակներ»,- ասաց Զակիրզյանովը։

Նա հիշեցրեց, որ Ուրայը գտնվում է Արևմտյան Սիբիրում, և հենց այս քաղաքում է հայտնաբերվել արևմտյան Սիբիրի նավթը, որը նրա այցեքարտն է դարձել։

Համագործակցություն հաստատելու մտադրություն ունի նաև Զլատոուստ քաղաքը՝ Քաջարանի հետ։ Ինչպես Sputnik Արմենիային ասաց Զլատոուստի քաղաքային շրջանի ղեկավար Մաքսիմ Պեկարսկին, պատվիրակությունն արդեն հանդիպել է Քաջարանի քաղաքապետի հետ։

Առաջիկայում կնախապատրաստվի քաղաքի ձեռնարկությունների և հնարավորությունների մասին ռեֆերենս-ցուցակ, որը հետագայում կներկայացվի Քաջարանում: Պեկարսկին հիշեցրեց, որ Զլատոուստն արդյունաբերական քաղաք է, որտեղ զարգացած են մետաղագործությունը, մեքենաշինությունը, սննդի արդյունաբերությունը։

Միաժամանակ քննարկվում է Կապանի և Մոսկվայի վարչական միավորներից մեկի միջև համագործակցության հուշագրի ստորագրման հնարավորությունը։