Բարեկամ երկրների երկու բուհեր Երևանում պայմանավորվեցին համագործակցել հնդիկ ուսանողների ուսուցման գործում։ Սա հայ–ռուսական գիտակրթական համաժողովի արդյունքներից մեկն էր։ Ռուսական կողմից համաձայնագիրը ստորագրեց Մարիի պետական համալսարանի (Յոշկար Օլա) ռեկտոր Միխայիլ Շվեցովը, հայկական կողմից` Երևանի «Մխիթար Գոշ» միջազգային համալսարանի` երկու երկրների համար հազվագյուտ անունով ռեկտոր Ֆայզան Բալավալան։
Նա Հնդկաստանի քաղաքացի է, կրթությունը ստացել է Ռուսաստանում, իսկ հեռանկարային աշխատանքի համար ընտրել է Հայաստանը։ Նրա խոսքով` այս երկու պետությունները մասնագիտությունների որակյալ ուսուցման առումով բարձր են գնահատվում իր հայրենիքում։
– Ինքս բժիշկ եմ, և մեզ մոտ` Նյու Դելիում, բժիշկների շուրջ 50 տոկոսն իրենց դիպլոմները պաշտպանել են ռուսական կամ հայկական բուհում, – ասում է բժիշկ Ֆայզանը։
Նրա խոսքով` Հնդկաստանում բարձրագույն կրթություն ստանալը թանկ է, այդ պատճառով հետխորհրդային տարածքում սովորելը բավական շահավետ է։ Բոլորին է հայտնի, որ վերադարձող ուսանողները հաջողությամբ անցնում են պարտադիր պետական ատեստավորումը և բարձր վարձատրվող աշխատանք ունենալու հնարավորություն են ստանում։
– Հայաստանում 3 մլն բնակչություն կա, Ռուսաստանում` 140 մլն, իսկ Հնդկաստանում միայն դպրոցականների թիվը 300 մլն է, – ասում է Շվեցովը։
Միխայիլ Շվեցով
© Sputnik / Zara Mika
Նախագիծը բավական հեռանկարային է թվում Հնդկաստանից ներդրումներ գրավելու համար։ Ընդ որում` Մոսկվայի կամ Սանկտ Պետերբուրգի համեմատ ավելի փոքր քաղաքների ընտրությունը բացատրվում է ազգային մտածելակերպով։ Բժիշկ Ֆայզանը նշում է, որ հնդիկ ուսանողները նախընտրում են ապրել և սովորել համեստ պայմաններում։ Ռեկտոր Շվեցովն էլ մեկ այլ հետաքրքիր դետալ է նշում` օտարերկրյա ուսանողների ավելացումը միջազգային է դարձնում բուհը, հետևաբար` նաև գրավիչ տեղի ուսանողների համար։
Ուսանողները Երևանում և Յոշկար Օլայում գործընկերային ծրագրով կուսանեն անգլերենով և ռուսերենով ու կհաղորդակցվեն հայերենով։ Դա միայն կամրապնդի Հնդկաստանի և Եվրոպայի մարդկանց կապերը, որոնց կյանքն ու գիտությունը միավորել են մեկ ընդհանուր հնդեվրոպական լեզվաընտանիքում։
Զրույցի մանրամասները` տեսանյութում։