ԵՐԵՎԱՆ, 15 հունիսի – Sputnik. Սահմանային լարվածությունն օրեցօր աճում է Ադրբեջանի կողմից մշտական հարձակումներով, ու սա ևս մեկ փորձ է խաթարելու շարունակվող խաղաղության գործընթացն ու զրոյացնելու միջազգային հանրության բոլոր ջանքերը։ Այս մասին «Թվիթերում» հրապարակում է արել Հատուկ հանձնարարություններով դեսպան Էդմոն Մարուքյանը՝ անդրադառնալով Ադրբեջանի այսօրվա սադրանքին։
Այսօր առավոտյան՝ ժամը 08:40-ի սահմաններում, Ադրբեջանի սահմանապահ ծառայության մի խումբ զինծառայողներ Հակարիի կամրջի ուղղությամբ առաջխաղացման փորձ են կատարել՝ ՀՀ տարածքում դրոշ տեղադրելու նպատակով։ Հայկական կողմի ձեռնարկած միջոցների արդյունքում ադրբեջանցի զինծառայողների առաջխաղացման փորձը կանխվել է։
«Սա հերթական սադրանքն է Ադրբեջանի զինված ուժերի կողմից։ Տեսանյութում երևում է, թե ինչպես են ադրբեջանական զինված ուժերը ռուս խաղաղապահների ներկայությամբ փորձում ՀՀ միջազգայնորեն ճանաչված ինքնիշխան տարածքում տեղադրել Ադրբեջանի դրոշը: Հայաստանի սահմանապահների գործողություններից հետո փորձը ձախողվել է»,-գրել է Մարուքյանը։
Դեսպանն իր հրապարակմանը կից նաև սադրանքի տեսանյութն է հրապարկել և հեշթեգով նշել է ԱՄՆ պետքարտուղար Էնթոնի Բլինկենին, ԵՄ անվտանգության և արտաքին քաղաքականության հարցերով բարձր ներկայացուցիչ Ժոզեպ Բորելին, Եվրոպայի խորհրդի նախագահ Շառլ Միշելին, Ֆրանսիայի նախագահ Էմանուել Մակրոնին և Գերմանիայի կանցլեր Օլաֆ Շոլցին։
Հիշեցնենք, որ հունիսի 15–ին, ժամը 13:35-ին էլ Սյունիքի Տեղի հատվածում Ադրբեջանի ԶՈւ-ի կողմից արձակված կրակոցների հետևանքով վիրավորում է ստացել ԱԱԾ սահմանապահ ծառայության զինծառայողը:
Իսկ ժամը 15:10-ին Ադրբեջանի ԶՈւ-ն Կապանի հատվածում տեղակայված հայկական դիրքի վրա կիրառել է ԱԹՍ։