ԵՐԵՎԱՆ, 14 հունիսի – Sputnik. ՀՀ Հակակոռուպցիոն դատարանը կրկին մերժել է պաշտպանության նախկին նախարար Դավիթ Տոնոյանի փաստաբանական թիմի ներկայացրած միջնորդությունը խափանման միջոց կալանքը փոխելու մասին։ Sputnik Արմենիայի հետ զրույցում տեղեկությունը հայտնեց Տոնոյանի պաշտպան Ավետիք Կարապետյանը։
«Դատարանի որոշումը երեկ ենք ստացել։ Հիմնավորումները չեն գոհացնում»,– նշեց փաստաբանը։
Նրա խոսքով` դատարանն իբրև հիմնավորում նշում է այն, որ Տոնոյանը, որպես նախկին բարձրաստիճան պաշտոնյա, կարող է ազդեցություն ունենալ գործով անցնող մարդկանց վրա։
«Շարունակում են նույն հիմնավորումը վկայակոչել, մինչդեռ 10 վկա հարցաքննվել է, մնացել են 5 վկաներ, որոնք էական նշանակություն ունեցող տեղեկություններ նախաքննության փուլում չեն էլ հայտնել»,– հավելեց փաստաբանը։
Կարապետյանի խոսքով` Տոնոյանի պաշտպանական թիմի հաջորդ քայլը լինելու է դատարանի որոշումը Վերաքննիչ քրեական դատարանում բողոքարկելը։
«Ներպետական ատյանները սպառելուց հետո նաև Մարդու իրավունքների եվրոպական դատարան գանգատ կներկայացվի»,– հայտնեց պաշտպանը։
Հիշեցնենք` 2021-ի սեպտեմբերի 30-ին ԱԱԾ-ն հայտնեց, որ Դավիթ Տոնոյանն ու զենքի մատակարարմամբ զբաղվող Դավիթ Գալստյանը ձերբակալվել են առանձնապես խոշոր չափերի հափշտակություն կատարելու կասկածանքով։
Այս գործով մեղադրանք է առաջադրվել նաև ԳՇ նախկին պետ Արտակ Դավթյանին, ԳՇ պետի նախկին տեղակալ Ստեփան Գալստյանին, ՀՀ ՊՆ ավիացիայի վարչության ավիացիոն տեխնիկական ունեցվածքի ծառայության պետ Արտյոմ Համբարյանին և ավիացիայի վարչության գլխավոր ինժեներ Վլադիմիր Բաբայանին: