Սյունիքի մարզի ավտոճանապարհներին ավտոմոբիլային կշեռքներ տեղադրելուց հետո գերբեռնված բեռնատարների թիվը պակասել է։ Տեղեկությունը Sputnik Արմենիային հայտնեցին Սիսիանի ավտոմոբիլային կշռման կետում։
Սիսիանի մաքսատան մոտով անցնող M2 մայրուղու վրա կշեռքները տեղադրվեցին 2022 թվականի ամռանը, որից հետո վարորդների շրջանում դժգոհության ալիք բարձրացավ։ Նրանցից շատերը ստիպված էին տուգանք վճարել հավելյալ քաշի պատճառով։
«Գերբեռնված բեռնատարների թիվը պակասել է։ Եթե նախկինում օրական 20 խախտում էր հայտնաբերվում, ապա այժմ 6-7-ի էլ չի հասնում»,- ասաց կշռման կետի աշխատակիցը։
Նա նշեց` այսօր, օրինակ, իրավախախտման վերաբերյալ ընդամենը երկու արձանագրություն է կազմվել, ընդ որում` բեռնատարների հավելյալ բեռնվածությունը երկու դեպքում էլ չի գերազանցել մեկուկես տոննան։
Վարորդներն աստիճանաբար ընտելանում են փոփոխություններին և փորձում են չխախտել սահմանված նորմերը։
Մեծ բեռնատարի առավելագույն թույլատրելի քաշը 40 տոննա է, «ԿամԱԶ» մակնիշի մեքենայինը` (բեռով հանդերձ)՝ 26 տոննա։ Առավելագույն քաշը չպետք է գերազանցի 11,5 տոննան։
Նա հիշեցրեց, որ գործող կարգավորումներով մեկ սռնու վրա ընկնող թույլատրելի շեմը գերազանցելու դեպքում բեռնափոխադրում իրականացնողները տուգանվում են 200.000 դրամով։
Աշխատակցի խոսքով` այս նախաձեռնությունը չափազանց կարևոր է, քանի որ գերբեռնված մեքենաները վնասում են ճանապարհները, բացի այդ, այդպիսի մեքենաները կարող են շուռ գալ հատկապես շրջադարձերի ժամանակ:
Հիշեցնենք` ՀՀ վարչապետ Նիկոլ Փաշինյանը 2022 թվականի հուլիսի 14-ին կառավարության նիստում հայտարարեց, որ Հայաստանում պետք է պարտադիր ճանապարհային կշեռքների համակարգ լինի, քանի որ երկրում մեծ թափով իրականացվող ճանապարհաշինական ծրագրերին զուգահեռ ճանապարհների որակական խնդիրները չեն լուծվել։ Ըստ նրա` Ճանապարհների որակի վրա շատ հաճախ ազդում է սահմանվածից ավելի քաշով բեռնված բեռնատարների երթևեկությունը։
Այժմ Հայաստանում տեղադրված են երկու ստատիկ և մեկ շարժական կշեռքներ։