ԵՐԵՎԱՆ, 8 հունիսի – Sputnik. Ազգային անվտանգության մարմինների ծառայողները արտոնյալ պայմաններով բնակարան ձեռք բերելու իրավունք կստանան։
Այդ նպատակով ՀՀ կառավարությունն այսօրվա նիստում հաստատեց «Զինվորական ծառայության և զինծառայողի կարգավիճակի մասին» օրենքից բխող, 2019թ–ին ընդունված որոշումը, որտեղ շահառուների ցանկում ավելացվել են նաև ԱԱԾ աշխատակիցները։
Ինչպես կառավարության նիստում նշեց ԱԱԾ տնօրենի տեղակալ Տիգրան Հարությունյանը, որոշման նպատակն է մատչելի և արտոնյալ պայմաններով երկարաժամկետ հիփոթեքային վարկավորմամբ լուծել բացառապես ազգային անվտանգության մարմիններում ծառայության մեջ գտնվող անձանց բնակարանային խնդիրը։
«Ծրագրի շրջանակում առաջարկվում է յուրաքանչյուր տարի ազգային անվտանգության մարմինների 40 ծառայողի հնարավորություն ընձեռել բարելավել բնակարանային պայմանները՝ մասնակցելով այդ նպատակով անցկացվող վիճակահանությանը»,– հայտնեց Հարությունյանը։
ԱԱԾ–ի հաշվարկներով` ՀՀ պետական բյուջեից այդ նպատակով կպահանջվի տարեկան շուրջ 157 մլն դրամ։
Ծրագիրը կմեկնարկի 2024 թվականից, ֆինանսական հատկացման առաջարկը ԱԱԾ–ն գործադրին կներկայացնի 2024 թվականի պետական բյուջեի նախագծի քննարկման շրջանակում։