ԵՐԵՎԱՆ, 7 հունիսի-Sputnik. ԵԱՏՄ տեխնոլոգիական ինքնաբավությունը Ռուսաստանի համար առաջնահերթություն է։ Այս մասին հայտարարել է ՌԴ վարչապետ Միխայիլ Միշուստինը Սոչիում ընթացող ԵԱՏՄ միջկառավարական խորհրդի նիստի ժամանակ:
«Միջկառավարական խորհրդի նիստին զուգահեռ տեղի կունենա ԱՊՀ կառավարությունների ղեկավարների խորհրդի հանդիպումը։ «Եվրասիան մեր տունն է» ցուցահանդեսին կներկայացվեն ինտեգրացիոն նախագծեր, նախատեսվում են նաև մի շարք այլ կարևոր միջոցառումներ: Մայիսի 25-ին Մոսկվայում կայացած Եվրասիական տնտեսական բարձրագույն խորհրդի նիստում Ռուսաստանի նախագահ Վլադիմիր Պուտինը նշել էր, որ միության շրջանակում համագործակցությունը շարունակում է ամրապնդվել, իսկ միությունը ներկայանում է որպես աշխարհի ինքնաբավ կենտրոններից մեկը: Հնգյակի երկրներին միավորում են երկարամյա բարեկամության ավանդույթները, նրանք հարգում են միմյանց շահերը և լուծում են իրենց քաղաքացիների համար կարևոր հարցերը, որպեսզի եվրասիական տարածքը հարմարավետ լինի բիզնեսի համար»,– նշել է Միշուստինը:
Մասնավորապես, 2015-2022 թթ ԵԱՏՄ երկրների ապրանքաշրջանառությունն աճել է 90 տոկոսով։
«Արդյունաբերական համագործակցություն և կապեր են հաստատվում թվային փոխակերպման ոլորտում, ձևավորվում են գազի, նավթի, էլեկտրաէներգիայի ընդհանուր շուկաներ, որոշումներ են կայացվում նոր լոգիստիկ հնարավորությունների վերաբերյալ, ամրապնդվում են կապերը արտերկրի գործընկերների հետ: Այդ համագործակցությունը հատկապես պահանջված է, երբ սրվել են համաշխարհային տնտեսության համակարգային խնդիրները»,–հավելել է Միշուստինը։
Նա հիշեցրել է, որ այս տարի Ռուսաստանը նախագահում է ԵԱՏՄ գործադիր մարմիններում, իսկ երկրի նախագահ Վլադիմիր Պուտինը նախանշել է նախագահության ընթացքում երկրի առաջնահերթությունները: Դա առաջին հերթին տեխնոլոգիական ներուժի և ինքնաբավության զարգացումն է, պարենային անվտանգության և տրանսպորտային ենթակառուցվածքի ամրապնդումը, որը համապատասխանում է նոր տնտեսական իրողություններին և հաշվի է առնում միության երկրներից յուրաքանչյուրի շահերը։
Հիշեցնենք, որ Եվրասիական զարգացման բանկի վերլուծաբանների գնահատականներով՝ ԵԱՏՄ երկրների փոխադարձ առևտուրը 2022 թ կազմել Է 80,6 մլրդ դոլար։
Հավելենք, որ ԵԱՏՄ միջկառավարական խորհրդի նիստից առաջ Միշուստինը հանդիպել է ՀՀ վարչապետ Նիկոլ Փաշինյանի հետ։
Եվրասիական տնտեսական միությունը միջազգային ինտեգրացիոն տնտեսական միավորում է, որը գործում է 2015 թվականի հունվարի 1-ից: Միության անդամներն են Ռուսաստանը, Հայաստանը, Բելառուսը, Ղազախստանն ու Ղրղզստանը: