ԵՐԵՎԱՆ, 5 հունիսի – Sputnik. Երևանի ընդհանուր իրավասության քրեական դատարանի դատավոր Մանվել Շահվերդյանը որոշեց զոհված զինծառայող Ժորա Մարտիրոսյանի մոր` Գայանե Հակոբյանի տնային կալանքը փոխարինել կալանքով։
«Կալանքի ժամկետը կսահմանվի 1 ամիս 15 օր։ Կալանքի ժամկետը կհաշվարկվի հունիսի 9–ից»,– հայտարարեց դատավոր Շահվերդյանը։
Պաշտպանական կողմն անվստահություն հայտնեց դատավորին։
Գայանե Հակոբյանն իր խոսքում նշեց, որ միջնորդություն չունի, սակայն դիմելով դատավորին` ասաց. «Եղեք ազնիվ ամեն մեկդ ձեր գործում, որը չի նկատվում ոչ մի բանի մեջ։ Այն, ինչ խոսվեց իմ մասին, դա իրական հանցագործների մասին է, բայց դա իմ մասին չէր, դա սազական չէ ինձ։ Իմ հոգեվիճակն ինձ թույլ չի տալիս այլևս նման նվաստացումների… Ես չեմ կարող ասել` իմ հետագա քայլերն ինչ կլինեն»։
Հիշեցնենք` մայիսի 17-ին տեղեկություն տարածվեց, թե «Որդիների կանչ» ՀԿ–ի անդամները փորձել են առևանգել վարչապետի որդուն։ Վերջինս հաղորդում էր ներկայացրել ոստիկանություն, որից հետո ՀՀ քննչական կոմիտե քրեական գործ է հարուցել մարդուն առևանգելու հոդվածով, կալանավորվել է մեկ անձ` Գայանե Հակոբյանը։
Այսօր հայտնի դարձավ, որ զոհված զինծառայողի մոր խափանման միջոցը փոխվել է, ընտրվել է տնային կալանքը։