ԵՐԵՎԱՆ, 29 մայիսի – Sputnik. Հայաստանն ըստ էության կատարել է Թուրքիայի ներկայացրած նախապայմանները, որոնք վերաբերել են ԼՂ հիմնախնդրին, Թուրքիայի նկատմամբ տարածքային նկրտումներից հրաժարվելուն, Հայոց ցեղասպանությանը։ Sputnik Արմենիայի մուլտիմեդիոն կենտրոնում հրավիրված ասուլիսի ժամանակ այս մասին ասաց քաղտեխնոլոգ Վիգեն Հակոբյանը՝ անդրադառնալով հարցին, թե ինչպիսին կլինեն Հայաստան-Թուրքիա հարաբերությունները Ռեջեփ Թայիփ Էրդողանի վերընտրվելուց հետո։
Թուրքիայում երեկ կայացել է նախագահական ընտրությունների 2–րդ փուլը։ Վերջնական արդյունքները դեռ հայտնի չէն, բայց նախնական տվյալներով` քվեաթերթիկների 99% մշակման արդյունքում Ռեջեփ Էրդողանը ստացել է ընտրողների 52.1% ձայները, իսկ ընդդիմադիր թեկնածու Քեմալ Քըլըչդարօղլուն` 47.9%–ը։
«Կարծում եմ` Հայաստան-Թուրքիա հարաբերություններում ամեն ինչ կանխատեսելի է այն առումով, որ Թուրքիան միշտ էլ նախապայմաններ է դրել, որոնցից գլխավորն այն է, որ Թուրքիայի վերաբերմունքը Հայաստանի նկատմամբ պայմանավորված է լինելու Լեռնային Ղարաբաղի հիմնախնդրի շուրջ պաշտոնական Երևանի դիրքորոշմամբ։ Այն բանից հետո, երբ Հայաստանը հրաժարվեց Արցախից, լվաց ձեռքերը և հանձնեց այն Ադրբեջանին, իհարկե, այդ նախապայմանը կատարվել է։ Կարծում եմ` մի քանի նախապայման էլ կա՝ Ցեղասպանության, Թուրքիայի նկատմամբ տարածքային նկրտումներից հրաժարվելու հետ կապված։ Այդ նախապայմանները, ըստ էության, կատարվել են, և նման հանգամանքներում ֆորմալ առումով Թուրքիան որևէ օբյեկտիվ պատճառ չունի, որպեսզի Հայաստանի նկատմամբ իր վերաբերմունքը չփոխի»,- նշեց քաղտեխնոլոգը։
Նա վստահ է՝ Թուրքիան Հայաստանի հետ իր հարաբերությունները միշտ պայմանավորելու է հայ-ադրբեջանական հարաբերություններում Հայաստանի դիրքորոշմամբ։
Հիշեցնենք՝ այսօր ՀՀ վարչապետ Նիկոլ Փաշինյանը հույս է հայտնել, որ Թուրքիայում տեղի ունեցած նախագահական ընտրություններից հետո Հայաստանը կկարողանա կարգավորել հարաբերություններն այդ երկրի հետ։