ԵՐԵՎԱՆ, 23 մայիսի – Sputnik. Իրանի հատուկ ծառայությունները երկրում գործող օտարերկրյա լրտեսական ցանց են վնասազերծել։ Այս մասին հայտնում է ՌԻԱ Նովոստին՝ վկայակոչելով ISNA գործակալությանը։
Ինչպես ասվում է Իրանի տեղեկատվության (հետախուզության) նախարարության հասարակայնության հետ կապերի բաժնի հայտարարության մեջ, ցանցը կապված է եղել օտարերկրյա հատուկ ծառայությունների հետ:
«Բացահայտվել է օտարերկրյա լրտեսական կազմակերպություններից մեկի խոշոր նախագիծը։ Այնկապված է իրանցի պաշտոնյաների (որոնք հաճախ են արտասահման ուղևորություններ կատարում) տվյալների գողության հետ։ Ցանցի գործակալները ձերբակալված են», - ասվում է հաղորդագրության մեջ։
Ինչպես պնդում Է ISNA-ն, գործակալների համար հետաքրքրություն էին ներկայացնում քաղաքացիների վերաբերյալ գաղտնի տեղեկատվությանը հասանելիություն ունեցող բարձրաստիճան անձանց, ինչպես նաև տարբեր պրոֆիլների մասնագետների տվյալները: Օտարերկրյա լրտեսական կազմակերպությունը տեղեկատվություն է ստացել պետական կազմակերպություններում տվյալների բազայի ադմինիստրատորներից՝ միջնորդների միջոցով փոխանցելով իրեն հետաքրքրող անձանց անունները։ Ցանցի շղթայի բոլոր մասնակիցները ձերբակալվել են։
Ավելի վաղ թուրքական Sabah պարբերականը հայտնել էր, որ Թուրքիայի Ազգային հետախուզական գործակալությանը (MIT) հաջողվել է Ստամբուլում բացահայտել իսրայելական հետախուզության «Մոսադ» գործակալական ցանցը, որը զբաղվում էր իրանական ընկերության ևԻԻՀ ավելի քան 20 քաղաքացիների գաղտնալսմամբ: