Բողոքի ակցիաներ և հանրահավաքներ են անցկացվում Հիրոսիմայում, որտեղ այսօր բացվել է G7-ի գագաթնաժողովը։ Տեղեկությունը հայտնում է ՌԻԱ Նովոստին։
Մարդիկ փողոց են դուրս եկել «Դեմ ենք գագաթնաժողովին։ Ո՛չ իմպերիալիստական G7 գագաթնաժողովին։ Ո՛չ ատոմային պատերազմին» կարգախոսներով։ Նրանց ուղեկցել են ոստիկանները։
Ընդհանուր առմամբ ոստիկաններն իրենց զուսպ են պահել, բայց եղել են դեպքեր, երբ ցուցարարներին փորձել են թիկունքից հրել ընթացքն արագացնելու համար։ Ի պատասխան ցուցարարները շղթա են կազմել և սկսել են շարքերով քայլել։
«Այսօր մոտ 350 մարդ է հավաքվել։ Ակցիան սկսել ենք երեկվանից և շարունակելու ենք ամեն օր։ Այսօր ևս մեկ հանրահավաք կլինի, որից հետո ցույցը կուղղվի դեպի Ատոմային ռմբակոծության գմբեթ (շենքը, որը մինչև 1945 թվականը Հիրոսիմայի Առևտրաարդյունաբերական պալատի Ցուցադրությունների կենտրոնն է եղել, պայթյունի Էպիկենտրոնի մոտակայքում գտնվող միակ պահպանված շենքն է. խմբ.)»,- ՌԻԱ Նովոստիին ասել է «Հիրոսիման ընդդեմ ատոմային պատերազմի» ակցիայի գործադիր կԿոմիտեի ղեկավար, հանրահավաքի կազմակերպիչ Ռյո Միյահարան:
2023 թվականին G7-ի նախագահությունն անցել է Ճապոնիային։ «Յոթնյակի» գագաթնաժողովը կկայանա Հիրոսիմայում մայիսի 19-21-ը։