ԵՐԵՎԱՆ, 18 մայիսի – Sputnik. ՀԱՊԿ երկրները պետք է միմյանց նեցուկ լինեն, ինքնիշխանության պահպանման համար այլ այլընտրանք չկա։ ԲԵԼՏԱ-ի փոխանցմամբ՝ Բելառուսի նախագահ Ալեքսանդր Լուկաշենկոն այս հայտարարությունն է արել ՀԱՊԿ Խորհրդարանական վեհաժողովի խորհրդի նիստի մասնակիցների հետ հանդիպման ժամանակ:
«Ուժ ունեցողներն այսօր փորձում են վերափոխել աշխարհը։ Եվ մենք ուշադրության կենտրոնում ենք, այնպես որ պետք է նեցուկ լինենք միմյանց: Դա մեր քաղաքականությունն է, որն առաջարկում ենք ձեզ: Կարծում եմ, որ մեր պետությունների ինքնիշխանության և անկախության պահպանման համար այլընտրանք չկա», - ասել է Լուկաշենկոն։
Նա համոզմունք է հայտնել, որ Բելառուսի նախագահության կարգախոսը՝ «Համերաշխության և համագործակցության միջոցով դեպի խաղաղություն և անվտանգություն», համապատասխանում է ՀԱՊԿ բոլոր անդամների շահերին:
«Այս առումով չի կարելի շրջանցել մեր շարքերի միասնության հարցը։ Բելառուսն իր նախագահության շրջանակում պատրաստվում է անհրաժեշտ ջանքեր գործադրել ՀԱՊԿ պետությունների համախմբվածության բարձրացման համար: Հենց առկա հակասությունների վերացման մեջ ենք տեսնում կազմակերպության ամրապնդման, պատասխանատվության գոտում անվտանգության ու կայունության ապահովման հեռանկարը», - ասել է Բելառուսի ղեկավարը։
ՀԱՊԿ-ի կազմում ընդգրկված են Հայաստանը, Բելառուսը, Ղազախստանը, Ղրղզստանը, Ռուսաստանը և Տաջիկստանը: