ԵՐԵՎԱՆ, 18 մայիսի – Sputnik. Երևանի Շենգավիթի առաջին ատյանի դատարանի մոտ լարված իրավիճակ է` զոհված զինծառայողների ծնողները պահանջում են ազատ արձակել զոհված Ժորա Մարտիրոսյանի մորը` Գայանե Հակոբյան–Մարտիրոսյանին։
Զոհված զինծառայող Մխիթար Գալեյանի հոր` Գարիկ Գալեյանի նյարդերը տեղի տվեցին և նա փորձեց մտնել դատարան, սակայն ոստիկանները թույլ չտվեցին, ասացին, որ նիստը դռնփակ է, և չեն կարող մոտենալ դատարանի շենքի դռներին։
Հավաքվածները սկսեցին վանկարկել «ազատությո՛ւն», «ամո՛թ», «ազատ արձակե՛ք հերոսածին մորը»։
Տեղում են նաև պատգամավորներ«ԱԺ «Պատիվ ունեմ» և «Հայաստան» խմբակցություններից, որոնք փորձում են հանդարտեցնել իրավիճակը։
Ծնողները նաև խնդրեցին ոստիկաններին` թույլ տալ, որպեսզի գոնե Գայանե Հակոբյանի դուստրը` Սոնան ներս մտնի և ներկա գտնվի դատական նիստին, սակայն ոստիկանները մերժեցին։
Հիշեցնենք, որ Երևանի Շենգավիթ վարչական շրջանի առաջին ատյանի դատարանում քննվում է Արցախյան 44-օրյա պատերազմում զոհված զինծառայող Ժորա Մարտիրոսյանի մոր` Գայանե Հակոբյանի ձերբակալության իրավաչափությանը վերաբերող պաշտպանների բողոքը։
Մայիսի 17-ին «Հայկական ժամանակ» օրաթերթը տեղեկություն էր տարածել, թե «Որդիների կանչ» ՀԿ–ի անդամները առևանգել են Աշոտ Փաշինյանին։ Նշել էին, որ այդ ժամանակ Աշոտը կարողացել էր դուրս նետել իրեն մեքենայից, այնուհետև, իբրև թե վրաերթի ենթարկվել։
Ժորա Մարտիրոսյանի մայրը հայտնել էր, որ ինքն ուղղակի ցանկացել է ուղեկցել Նիկոլ Փաշինյանի որդուն դեպի «Եռաբլուր» զինվորական պանթեոն։