ԵՐԵՎԱՆ, 18 մայիսի - Sputnik. ԱՄՆ-ն աջակցում է Ադրբեջանի և Հայաստանի միջև ուղիղ երկխոսությանը`անկախ նրանից, թե որտեղ են ընթանում բանակցությունները։ Այս մասին այսօր ճեպազրույցի ժամանակ հայտարարել է ԱՄՆ Պետդեպարտամենտի մամուլի ծառայության ղեկավարի տեղակալ Վեդանտ Պատելը՝ մեկնաբանելով Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի կայանալիք հանդիպումը, որը նախատեսված է մայիսի 25-ին Մոսկվայում։
«Մենք ողջունում ենք հաղորդագրություններն այն մասին, որ կողմերը մտադիր են շարունակել քննարկումները։ Կրկնեմ՝ մենք համոզված ենք, որ խաղաղությունը հասանելի է, և որ ուղիղ երկխոսությունն է այդ խնդիրների լուծման բանալին։ Կողմերի միջև ուղիղ բանակցությունները սկզբունքորեն կարևոր են, և մենք ուրախ ենք, որ դրանք ընթանում են, որտեղ էլ որ դրանք տեղի ունենան՝ Արլինգտոնում (ԱՄՆ Վիրջինիա նահանգ- խմբ), Բրյուսելում, թե Մոսկվայում»,-նշել է նա։
Պատելը ուղիղ պատասխան չի տվել այն հարցին, թե արդյոք Մոսկվայի և Վաշինգտոնի միջև «կուլիսային բանակցություններ» են ընթանում այս հարցի շուրջ:
«Չխորանալով դիվանագիտական հարաբերությունների մանրամասների մեջ` կարող եմ ասել, որ պատճառներից մեկը, թե ինչու ենք մենք երկկողմ հարաբերություններ պահպանում Ռուսաստանի հետ նույնիսկ հսկայական ճնշման ժամանակաշրջանում, իհարկե, մեր երկրների առջև ծառացած մի շարք հարցերն են, որոնք մենք պետք է ամենայն պատասխանատվությամբ համապատասխան ձևով քննարկենք»,- ասել է նա: