ԵՐԵՎԱՆ, 13 մայիսի – Sputnik․ Ադրբեջանական սադրանքի պատճառով նախօրեին զոհված 20-ամյա Նարեկ Բաղդասարյանը, որը Գառնի համայնքից էր, տան միակ տղան էր, զորացրվելուն էլ ընդամենը 50 օր է մնացել։ Այս մասին Sputnik Արմենիայի հետ զրույցում ասաց Գառնու համայնքապետ Տիգրան Պողոսյանը։
Նարեկը 2 քույր ունի, ծնողները գյուղատնտեսությամբ են զբաղվում։
«Ընտանիքում 3 երեխա էին, քույրերն իրենից մեծ են, ամուսնացած են։ Գյուղում նրան հաճախ էի տեսնում։ Տարիքային տարբերությունը մեծ էր, առանձնապես չենք շփվել, բայց հստակ կարող եմ ասել՝ Նարեկը խելացի, լավ մարդ էր,»,- նշեց Պոսոսյանը։
Համայնքապետը նաև ընդգծեց, որ 20-ամյա Նարեկի հոգեհանգիստը տեղի կունենա այսօր, իսկ հուղարկավորությունը՝ վաղը։
Կոտայքի մարզպետ Ահարոն Սահակյանն էլ «Ֆեյսբուքում» ցավակցություն է հայտնել Նարեկի զոհվելու առնչությամբ։ Նա գրել է, որ հարազատական ամենամոտ կապերն ուներ ու Նարեկին մանկուց է ճանաչել։
Ահարոն Սահակյանը տղային նկարագրել է որպես անչափ զուստ, համեստ և հայրենասեր։
Հիշեցնենք` Ադրբեջանի ԶՈւ ստորաբաժանումները մայիսի 11–ին հրետանային և ականանետային միջոցներից կրակ են բացել Սոթքի մոտ տեղակայված հայկական դիրքերի ուղղությամբ: Հայկական կողմն այդ սադրանքի հետևանքով ունի 4 վիրավոր։
Նույն օրը Ադրբեջանի ԶՈւ–ն հրետանային միջոց է կիրառել Գեղարքունիքի մարզի Նորաբակի և ականանետ` Վերին Շորժայի ուղղությամբ։
Մայիսի 12-ին Ադրբեջանը կրակել է Կութ գյուղի ուղղությամբ, Սոթքի ուղղությամբ կիրառել ԱԹՍ։ Թշնամու կրակոցների հետևանքով զոհվել է մեկ, վիրավորել 2 զինծառայող
2 օրերի սադրանքների հետևանքով հայկական կողմն ընդհանուր ունի 1 զոհ (Նարեկ Նորայրի Բաղդասարյանը` ծնվ. 2003 թ), 6 վիրավոր։