Հենրիխ Մխիթարյանը դարձել է Չեմպիոնների լիգայի կիսաեզրափակիչի լավագույն ֆուտբոլիստ

ԵՐԵՎԱՆ, 11 մայիսի – Sputnik. Միլանի «Ինտերի» կիսապաշտպան Հենրիխ Մխիթարյանը ճանաչվել է Չեմպիոնների լիգայի կիսաեզրափակիչի՝ «Միլան»- «Ինտեր» հանդիպման լավագույն ֆուտբոլիստ։ Տեղեկությունը հայտնում են ՈւԵՖԱ-ից։

Ֆուտբոլիստի գրանցած հաջողությանն անդրադարձել է նաև Հայաստանի ֆուտբոլի ֆեդերացիան։

«Բրավո՛, Հենո՛»,– գրված է ՀՖՖ–ի ֆեյսբուքյան էջում։

Ֆեդերացիան նշել է, որ Հենրիխ Մխիթարյանը դարձել է առաջին հայ ֆուտբոլիստը, որ գոլի հեղինակ է դարձել Չեմպիոնների լիգայի կիսաեզրափակիչում։

Նա դարձել է նաև պատմության 7-րդ ամենատարեց ֆուտբոլիստը, որը գոլի հեղինակ է դարձել Չեմպիոնների լիգայի կիսաեզրափակիչում:

Նշենք, որ «Միլան»- «Ինտեր» խաղն ավարտվել է 2:0 հաշվով։

«Ինտերի» կազմում գոլերի հեղինակ են դարձել Բոսնիա և Հերցեգովինայի ազգային հավաքականի հարձակվող 37– ամյա Էդին Ջեկոն ու 34– ամյա Հենրիխ Մխիթարյանը։

Պատասխան հանդիպումը տեղի կունենա մայիսի 16-ին Միլանի «Ջուզեպպե Մեացցա» մարզադաշտում։