ԵՐԵՎԱՆ, 5 մայիսի – Sputnik. Երևանում «Նեմեսիս» գործողության հերոսների հիշատակը հավերժացնող հուշակոթողի տեղադրման որոշումըկայացվել է տեղական ինքնակառավարման մարմնի կողմից։ Այս մասին ասել է ՀՀ ԱԺ նախագահ Ալեն Սիմոնյանն Անկարայում անցկացված մամուլի ասուլիսի ժամանակ։
Ապրիլի 29-ին Թուրքիան առանց նախապես տեղեկացնելուփակել էր իր օդային տարածքը հայկական «FlyOne Armenia» ավիաընկերության համար, Փարիզ–Երևան չվերթն իրականացնող ինքնաթիռը հարկադիր վայրէջք էր կատարել Քիշնևում և միայն ապրիլի 30-ի գիշերնիջել «Զվարթնոց» օդանավակայանում։
Ապրիլի 3–ին Թուրքիայի արտգործնախարարՄևլութ Չավուշօղլուն հայտարարեց, որ Թուրքիան Հայաստանի համար իր օդային տարածքը դեպի երրորդ երկրներ թռիչքների համար փակել է Երևանում «Նեմեսիս» գործողության հերոսների հուշարձանի բացման պատճառով։
Ալեն Սիմոնյանը ցավ է հայտնել, որ հուշարձանի տեղադրումը նման արձագանք է ստացել Թուրքիայում։
«Որոշումը կայացվել է տեղական ինքնակառավարման մարմնում, և ես չեմ ցանկանում, որ արձանի տեղադրումն այստեղ ընկալվի որպես Հայաստանի պետական արտաքին քաղաքականության դրսևորում կամ որպես ոչ բարիդրացիական քայլ։ Հայաստանում պետական արտաքին քաղաքականությունն իրականացվում է վարչապետի և արտգործնախարարի կողմից, այս մակարդակում կայացված որոշումներին վերջին ամիսների ընթացքում բոլորդ եք ականատես», - ընդգծել է Սիմոնյանը։
Ըստ նրա` ցանկության դեպքում միշտ կարելի է պատճառներ գտնել հարաբերությունները վատացնելու համար, ինքն էլ կարող էր հազար պատճառ գտնել Թուրքիա չմեկնելու համար։
«Բայց ես այստեղ եմ, որ թուրք հասարակությանն ասեմ` Հայաստանը պատրաստ է խաղաղության և հարաբերությունների կարգավորման առանց նախապայմանների»,– շեշտել է Սիմոնյանը։
Ալեն Սիմոնյանը հավելել է, որ Հայաստանը լիովին անկեղծ է հարաբերությունները կարգավորելու իր ձգտման մեջ:
«Եթե մենք ունենք քաղաքական կամք, եթե ունենք հարաբերություններ վերականգնելու և կարգավորելու որոշում, այդ ճանապարհը հեշտ չի լինելու։ Բայց մենք պետք է առաջ շարժվենք»,– ասել է ԱԺ խոսնակը։
Նա հույս է հայտնել, որ իրենց թուրք գործընկերները ևս դեպի առաջ քայլ կանեն։
«Մենք կօգտվենք այս պատմական հնարավորությունից։ Մենք նոր էջ ենք բացում ինչպես մեր, այնպես էլ ողջ տարածաշրջանի համար»,– եզրափակել է Սիմոնյանը։
Հիշեցնենք` ԱԺ նախագահ Ալեն Սիմոնյանի գլխավորած պատվիրակությունը Թուրքիա է մեկնել` ամասնակցելու Սևծովյան տնտեսական համագործակցության խորհրդարանական վեհաժողովի հիմնադրման 30-ամյակին նվիրված գագաթնաժողովին։
Հայաստանից Անկարա են մեկնել նաև ՔՊ-ականներ Բաբկեն Թունյանն ու Գևորգ Պապոյանը։