ԵՐԵՎԱՆ, 5 մայիսի – Sputnik. 44-օրյա պատերազմից 2.5 տարի անց 25-ամյա Արայիկ Բաղդասարյանի հոգեհանգիստն է։ Գերմանիայում կատարված ԴՆԹ հետազոտությունը հաստատել է, որ գտնված մասունքն Արայիկինն է։ Sputnik Արմենիայի տեղեկություններով` տարբեր մասունքների ԴՆԹ հետազոտություններ են արվել, փորձաքննված վերջին մասունքը ևս մի քանի անգամ է ԴՆԹ հետազոտության ենթարկվել ոչ միայն Հայաստանում, այլև տարբեր երկրներում։ Դրա պատճառը փորձաքննությունների պատասխանների անհամապատասխանություններն էին։
Արայիկ Բաղդասարյանը 25 տարեկան էր, պատերազմ էր մեկնել որպես կամավոր։ Մեր տեղեկություններով` ռեստորաններից մեկում խոհարար էր աշխատում։ Սեպտեմբերի 27-ին տուն է վերադարձել` իր հետ բերելով խոհարարական գործիքները, ի պահ տվել մորն ու սեպտեմբերի 28-ին Արցախ մեկնել։ Մարտնչել է Ջրականում, եղել է ջոկի հրամանատար։ Նա նաև Ապրիլյան պատերազմի մասնակից էր։
Նշենք, որ նրա մայրը` տիկին Գոհարը, 2022թ. սեպտեմբերի 21-ին Եռաբլուրում ոստիկանների կողմից բռնության ենթարկված ծնողներից է։ Տիկին Գոհարին ոստիկանները բառի բուն իմաստով քարշ էին տվել ոտքերից ու ձեռքերից բռնած։
Արայիկի հուղարկավորությունը կկայանա վաղը` ժամը 13։00–ին, Եռաբլուրում։