ԵՐԵՎԱՆ, 1 մայիսի – Sputnik. Black bloc արմատականների և ոստիկանների միջև կոշտ բախումները սկսվել են Փարիզում ցույցի մեկնարկից անմիջապես հետո, ոստիկանությունն արցունքաբեր գազ է կիրառել, հաղորդում է ՌԻԱ Նովոստին:
Երթի մեկնարկից հետո նրանք սկսել են քանդել ոչ միայն բանկերի, այլև այլ ձեռնարկությունների ցուցափեղկերը։ Արմատականները կոտրել են պատճենահանման ծառայություններ մատուցող ընկերության գրասենյակի ցուցափեղկերը, սկսել են դուրս հանել կահույքը, կոտրել համակարգիչները։ Նրանք նաև քանդել են ավտոբուսի կանգառները և հրդեհել են աղբամանները։
Արմատականներն օգտագործել են ինքնաշեն պայթուցիկ սարքեր։ Ոստիկանությունը սկսել է հետ մղել ցուցարարներին՝ կիրառելով ձայնային նռնակներ և արցունքաբեր գազ։
Ֆրանսիայում մայիսի 1-ին տեղի են ունենում ցույցեր «ընդդեմ կենսաթոշակների բարեփոխման և սոցիալական արդարության համար»: Իշխանությունները սպասում են մոտ 650 հազար ցուցարարների։ Նշվում էր, որ մայիսմեկյան ավանդական ցույցը, երբ ցուցարարները դժգոհություն են հայտնում աշխատանքային պայմաններից, կվերածվի գլոբալ բողոքի ընդդեմ պետության վարած քաղաքականության:
Հունվարի 10-ին Ֆրանսիայի վարչապետ Էլիզաբեթ Բորնը կենսաթոշակային բարեփոխումների վիճահարույց նախագիծ էր ներկայացրել, որը կառավարությունը նախատեսում է ընդունել 2023 թվականին։
Նրա խոսքով` իշխանությունները 2023 թվականի սեպտեմբերի 1-ից տարեկան երեք ամսով կսկսեն բարձրացնել կենսաթոշակային տարիքը։ Այդպիսով` մինչև 2030 թվականը կենսաթոշակային տարիքը կհասնի 64–ի։