ԵՐԵՎԱՆ, 29 ապրիլի – Sputnik. Ուկրաինային 2024 թվականին կարող է Եվրամիությունից ևս 18 միլիարդ եվրո ֆինանսական օգնություն անհրաժեշտ լինել։ Այս մասին ասել է Ուկրաինայի ֆինանսների նախարար Սերգեյ Մարչենկոն, հայտնում է Bloomberg գործակալությունը:
«Իհարկե, դա (ֆինանսական օգնության գումարը, – խմբ.) կախված է ռազմական արշավից, բայց ես կարծում եմ, որ այն կարող է լինել ոչ պակաս, քան գոյություն ունեցող գումարը՝ 18 մլրդ եվրոյի չափով», - ասել է Մարչենկոն Եվրամիության ֆինանսների նախարարների և Շվեդիայի Կենտրոնական բանկերի ղեկավարների հետ ոչ պաշտոնական հանդիպման շրջանակում:
Bloomberg-ը պարզաբանում է, որ խոսքը 2024 թվականին Եվրամիության կողմից Ուկրաինային հնարավոր ֆինանսական աջակցության մասին է: Մարչենկոյի կարծիքով՝ Կիևի ֆինանսավորման կարիքները հսկայական կլինեն։
Նշենք` ԵՄ խորհուրդն անցյալ տարվա դեկտեմբերին համաձայնեցրել էր փաստաթղթերի փաթեթը, որը թույլ կտա Եվրամիությանը 2023 թվականին Ուկրաինային 18 մլրդ եվրոյի վարկային աջակցություն տրամադրել։
Ապրիլի կեսերին Մարչենկոն հայտարարել էր, որ ուկրաինական բյուջեի դեֆիցիտը ամսական կազմում է մոտ 5 միլիարդ դոլար, միջոցների երկու երրորդը բյուջեն ստանում է օտարերկրյա փոխառությունների և դրամաշնորհների շնորհիվ, մինչդեռ բյուջետային ծախսերի երեք քառորդը բաժին է ընկնում ռազմական կարիքներին։
Ավելի վաղ Ուկրաինայի նախկին վարչապետ Նիկոլայ Ազարովը կանխատեսել էր, որ Ուկրաինայի պետական պարտքի ծավալը տարեվերջին կարող է հասնել ռեկորդային 173 մլրդ դոլարի: