ԵՐԵՎԱՆ, 27 ապրիլի – Sputnik. Եվրոպական երկրների արդարացի, թիրախային աջակցությունը մեր պետության և Արցախի նկատմամբ կարևոր է։ Նշել է ՀՀ ԱԺ «Հայաստան» խմբակցության ղեկավար Սեյրան Օհանյանն այսօր Հայաստանում Շվեյցարիայի դեսպան Լուկաս Ռոզենկրանցի հետ հանդիպման ժամանակ։ Տեղեկությունը հայտնում է ԱԺ մամուլի և հասարակայնության հետ կապերի բաժինը։
Հանդիպման ժամանակ դեսպանին են ներկայացվել Հայաստանի անվտանգային խնդիրները, Լաչինի միջանցքի փակման հետևանքով Արցախում ստեղծված հումանիտար ճգնաժամը, ադրբեջանական կողմից Լաչինի միջանցքում անցակետի տեղադրումը:
«Ադրբեջանի հռետորաբանությունը և Հայաստանի ինքնիշխան տարածքի նկատմամբ սադրանքները չեն խոսում հայ ժողովրդի հետ այդ երկրի հայտարարած խաղաղ համակեցությամբ ապրելու մասին»,-ասել է Օհանյանը։
Նա ընդգծել է, որ այսօր էլ Ադրբեջանը շարունակում է սադրանքներն ու ճնշումները և սեղմում Արցախի շուրջ օղակը: Շեշտվել է` արցախահայությունը չի կարող լինել Ադրբեջանի կազմում: Սեյրան Օհանյանը նշել է, որ արցախահայության համար անվտանգության երաշխիք կարող է լինել բացառապես կարգավիճակի խնդրի լուծումը` Արցախի ժողովրդի ինքնորոշման իրավունքի իրացումը: Ընդդիմադիր խորհրդարանականները կարևորել են միջազգային գործընկերների դերակատարությունը նաև ՀՀ տարածքից ադրբեջանական զինված ուժերի դուրսբերման հարցում։
Օհանյանն ընդգծել է ՌԴ խաղաղապահների և Արցախի պաշտպանության բանակի համագործակցության խորացման կարևորությունը:
Հավելենք, որ Շվեյցարիայի դեսպանի հետ հանդիպմանը մասնակցել են նաև «Հայաստան» խմբակցության պատգամավորներ Աղվան Վարդանյանն ու Արթուր Խաչատրյանը։