ԵՐԵՎԱՆ, 24 ապրիլի – Sputnik. ՌԴ Պետդումայի պատգամավոր, Հայ-ռուսական «Լազարյան ակումբի» համակարգող Կոնստանտին Զատուլինը կազմակերպության անունից հայտարարություն է տարածել, որում մտահոգություն է հայտնել Լեռնային Ղարաբաղի շուրջ ընթացող գործընթացների կապակցությամբ:
Օսմանյան կայսրությունում Հայոց ցեղասպանության 108-րդ տարելիցին նվիրված հայտարարության մեջ նշվում է, որ Լեռնային Ղարաբաղի հայությունն այսօր էլ կանգնած է բնաջնջման վտանգի առջև և անհրաժեշտ է միավորել ջանքերը նոր ողբերգությունը կանխելու համար:
Քաղաքական գործչի խոսքով՝ նախորդ շաբաթ Հայաստանի խորհրդարանում վարչապետ Նիկոլ Փաշինյանը բացահայտ հայտարարեց Լեռնային Ղարաբաղի ինքնորոշմանը աջակցելուց և այնտեղ դարեր շարունակ բնակվող հայրենակիցների ճակատագրի հանդեպ հետաքրքրությունից հրաժարվելու մասին: Դրանից անմիջապես հետո Բաքվում նոր վերջնագիր առաջ քաշեցին՝ կա՛մ Լեռնային Ղարաբաղի հայերն Ադրբեջանի քաղաքացիություն են ընդունում, կա՛մ պետք է հեռանան՝ թողնելով այդ հողը։
Լեռնային Ղարաբաղի ճակատագրում նոր վտանգավոր շրջադարձի կապակցությամբ «Լազարյան ակումբն» իր բողոքն է հայտնում Ղարաբաղի ժողովրդին ազատության և ինքնորոշման իրավունքից զրկելու փորձի դեմ:
Հայտարարության հեղինակները Հայաստանի գործող իշխանությանը մեղադրում են ազգային դավաճանության մեջ, որն ուղեկցվում է կա՛մ երկրի նախկին ղեկավարների, կա՛մ Ռուսաստանի հասցեին անընդհատ հնչող մեղադրանքներով, ինչպես նաև պատմական թշնամիներին քծնելով:
Հայտարարության համաձայն` ՀՀղեկավարությունը ՀԱՊԿ զորավարժությունները Հայաստանում չընդունելու ֆոնին խոսում է ՆԱՏՕ-ի զորավարժություններին մասնակցության մասին: Վերոգրյալի կապակցությամբ «Լազարյան ակումբը» (որը հավաքել է տարբեր ազգությունների և մասնագիտությունների տեր մարդկանց, որոնք անտարբեր չեն Ռուսաստանի և Հայաստանի ժողովուրդների ճակատագրերի նկատմամբ) Հայաստանի և ամբողջ աշխարհի հայերին դիմում էմիասնության կոչով՝ հանուն հայ ազգի փրկության և Լեռնային Ղարաբաղում մարդու իրավունքների պաշտպանության: