ԵՐԵՎԱՆ, 21 ապրիլի – Sputnik. Երևանում անցկացվող ծանրամարտի Եվրոպայի առաջնությունում 96 կգ քաշային կարգում երկամարտի 377 կգ արդյունքով Եվրոպայի չեմպիոնի կոչումը նվաճած Դավիթ Հովհաննիսյանն իր հաղթանակը նվիրում է զինվորներին։ Դավիթը լրագրողների հետ զրույցում հայտնեց այդ մասին։
«Հաղթանակը նվիրում եմ մեր զինվորին` թող միշտ ամուր լինեն»,–ասում է նա։
Դավիթի խոսքով` լավ էր պատրաստվել մրցումներին, ինչն էլ իր արդյունքը տվեց։ Ըստ նրա`Երևանում անցկացվող ծանրամարտի Եվրոպայի առաջնությունը ադրենալինով լի մրցաշար է, որը շատ լավ է կազմակերպված։
364 կգ արդյունքով արծաթե մեդալակիր դարձած Արա Աղանյանն էլ նշեց, որ հարթակում իրեն լավ չի զգացել և գոհ չէ ցուցաբերած արդյունքից։
«Նախորդ առաջնությանն ավելի շատ եմ բարձրացրել։ Կփորձեմ առավելագույնն անել հաջորդ տարի։ Շնորհավորում եմ Դավիթին. ինձ համար տարբերություն չկար` ես, թե Դավիթը կհաղթեինք»,–ասաց Արան։
Նա հավելեց, որ Եվրոպայի ոչ մի առաջնության ժամանակ հանդիսատեսի կողմից նման աջակցություն չի եղել, ինչպես հիմա էր։
Հիշեցնենք` ծանրամարտի Եվրոպայի առաջնությանը հայտագրված են 40 երկրների 389 մարզիկներ:
Առաջնությունը կընթանա ապրիլի 15-ից 23-ը։