ԵՐԵՎԱՆ, 18 ապրիլի – Sputnik. ՀՀ պետական եկամուտների կոմիտեն 17 դեպքով արձանագրել է առանց համապատասխան հաշվարկային փաստաթղթեր դուրս գրելու` ընդհանուր 5 մլն 933 հազար 959 դրամի հարկային օրենսգրքի պահանջների խախտումով ապրանքների տեղափոխման կամ մատակարարման դեպքեր։ Տեղեկությունը հայտնում է ՊԵԿ մամուլի ծառայությունը։
«3 դեպքով կազմվել են ապօրինի ձեռնարկատիրական գործունեությամբ զբաղվելու վերաբերյալ արձանագրություններ։ Ապօրինի ձեռնարկատիրական եկամտի չափը կազմել է 3 մլն 490 հազար ՀՀ դրամ: Հնարավոր տուգանքի գումարը կազմում է 1 մլն 800 հազար ՀՀ դրամ: Եվս 3 դեպքով արձանագրվել են լիցենզավորման կամ ծանուցման ենթակա գործունեությունն առանց լիցենզիայի կամ առանց ծանուցման իրականացնելու կամ առանց թույլտվության կամ առանց լիցենզիայի ընդերքը կամ բնական պաշարներն օգտագործելու խախտումներ։ Այս պարագայում, արձանագրված խախտումների գումարը կազմել է 170 մլն 550 հազար ՀՀ դրամ»,– ասված է հաղորդագրությունում։
Բոլոր արձանագրումները եղել են 2023 թվականի ապրիլի 1-ից 15-ն ընկած ժամանակահատվածում։