ԵՐԵՎԱՆ, 18 ապրիլի – Sputnik. Հայաստանում երկրորդ անգամ կանցկացվեն Ռուսական կինոյի օրերը` «Russian Film Festival»–ը։ Այս մասին հայտնում են կազմակերպիչները։
Միջոցառումը «Ռոսկինո» ընկերությունը կազմակերպել է ՌԴ մշակույթի նախարարության աջակցությամբ։ Մշակութային միջոցառումները կմեկնարկեն Երևանում, որտեղ ապրիլի 28-30-ը մի շարք ցուցադրություններ կանցկացվեն։
Գյումրիում մայիսի 5-7–ը կկայանա ռուսական վարձույթի ռեկորդակիր դարձած «Չեբուրաշկա» գեղարվեստական ֆիլմի անվճար ցուցադրությունը։ Ծրագրում կան նաև արկածային, ֆանտաստիկ, սպորտային դրամայի, թրիլլերի, կենսգրական դրամայի և անիմացիոն ժանրերի ֆիլմեր։
Երևանում Ռուսական կինոյի օրերի ծրագրում ներառված են նաև «Սուսերով պարը» կենսագրական դրաման՝ Արամ Խաչատրյանի համանուն երաժշտական գլուխգործոցի ստեղծման պատմությունը, «Պարոն Նոկաուտ»-ը սպորտային դրաման՝ լեգենդար խորհրդային բռնցքամարտիկի մասին, «Հանցակիցները» թրիլլերը և «Ֆիննիկը» լիամետրաժ անիմացիոն ֆիլմը՝ տան բարի ոգու արկածների մասին։
Գյումրիում, բացի «Չեբուրաշկա»-ից, հանդիսատեսը հնարավորություն կունենա դիտելու «Քրոնոս» ընտանեկան ֆիլմը՝ հիմնված ֆանտաստ գրող Կիր Բուլիչևի պատմվածքների վրա, «Մայաների Օրացույց»-ը ֆիլմը, դեռահասների արկածների մասին, որոնց կյանքը խորհրդավոր կերպով հակառակ ուղղությամբ է շարժվում, «Մարդուկ Ջարդուկն ու կախարդական ֆլեյտան» և «Խաղալիք Բում» անիմացիոն ֆիլմերը:
Ցուցադրություններից շատերը կանցկացվեն այդ ֆիլմերի ստեղծողների մասնակցությամբ։ Այսպես օրինակ` «Հանցակիցները» թրիլլերը կներկայացնեն գլխավոր պրոդյուսեր Գեորգի Շաբանովը և պրոդյուսեր Օլգա Երոֆեևան։ «Մայաների Օրացույց» ֆանտաստիկ ֆիլմի մասին կպատմի գլխավոր պրոդյուսեր Յուրի Օբուխովը։ Ցուցադրություններից հետո հանդիսատեսը հնարավորություն կունենա ֆիլմերը քննարկել ճանաչված կինոքննադատ Դիանա Մարտիրոսյանի հետ։
Հիշեցնենք, որ RFF–ի հիմնական նպատակն է ծանոթացնել արտասահմանյան հանդիսատեսին ռուսական ժամանակակից կոնտենտի բազմազանությանը` տարբեր ժանրերի գեղարվեստական ֆիլմերից և սերիալներից մինչև անիմացիոն և վավերագրական ֆիլմեր։ RFF–ի ձևաչափը ներառում է ինչպես առցանց ցուցադրություններ, այնպես էլ համացանցից դուրս կազմակերպվող միջոցառումներ։