ԵՐԵՎԱՆ, 17 ապրիլի – Sputnik. «Զվարթոց» օդանավակայանում մեծ շուքով դիմավորել են Թուրքիայից ոսկե և արծաթե մեդալներով վերադարձող մարմնամարզիկներ Արթուր Դավթյանին, Վահագն Դավթյանին և Հայաստանի թիմին։
Նշենք, որ Թուրքիայի Անթալիա քաղաքում անցկացվում էր Եվրոպայի առաջնությունը, որտեղ Արթուր Դավթյանը դարձավ առանձին գործիքների հենացատկի ոսկե, նժույգ թափերի` բրոնզե մեդալակիր, իսկ Վահագն Դավթյանն արծաթե մեդալ ստացավ։
«Շատ ուրախ եմ ու հպարտ, որ Թուրքիայից ոսկե մեդալով եմ վերադառնում: Հենացատկում դժվար պայքար էր: Անգլիացի Ջեյք Ջարմանն իր ցատկը 4 տասնորդական ավելի բարձր կատարեց: Ինձ ոսկե մեդալ շնորհեց երկրորդ ցատկս, որը շատ հստակ էր: Իմ և անգլիացի մրցակցիս միավորների տարբերությունը չնչին էր, բայց ուրախ եմ, որ ոսկե մեդալ նվաճեցի: Դժվար էր, բայց հաջողությամբ արեցի այն, ինչ անում էի մարզումներին։ Ուրախ եմ, որ կարողացա մեր դրոշը բարձրացնել Թուրքիայում և հիմնը հնչեցնել»,– լրագրողների հետ զրույցում ասաց Դավթյանը։
Նրա խոսքով` մի փոքր լարվածություն կար այն առումով, որ Թուրքիայում էին, չնայած, որ լավ են ընդունել և ոչ մի խնդիր չի եղել։ Մարմնամարզիկը նշեց, որ ուրախ է նաև նժույգ թափեր վարժությունը կատարելուց հետո բրոնզե մեդալ նվաճելու համար։
«Ես կարողացա իմ վարժությունը լավ կատարել և մեդալի համար պայքարելու հնարավորություն ստանալ: Եզրափակիչում վարժության մեջ որոշակի փոփոխություն արեցինք և մաքրության հաշվին բրոնզե մեդալ նվաճեցի։ Ցավոք, տղաները չկարողացան հաղթահարել որակավորման փուլը և դուրս գալ եզրափակիչ»,– ընդգծեց Արթուր Դավթյանը։
Վահագն Դավթյանն էլ շնորհակալություն է հայտնել իրենց մարզիչներին կատարած մեծ աշխատանքի համար և շեշտել, որ իրենց նվաճած մեդալները մեծ թիմի աշխատանքի արդյունք է։
Վահագն Դավթյան
Վահագնը ասում է` օղակներ վարժությունում բարդ եզրափակիչ է ստացվել, քանի որ Եվրոպայի 8 ուժեղագույնն էին պայքարում և մրցումային լարվածություն կար:
«2016 թվականից հետո միշտ մեդալին շատ մոտ եմ եղել, մի տարի 4-րդ, ապա 5-րդ տեղ: Գնահատականներս մեդալներին շատ մոտ են եղել, բայց չնչին միավորներ չէին բավականացնում: Այս անգամ ստացվեց, և շատ ուրախ եմ: Յուրաքանչյուր մեդալ նոր մոտիվացիա է: Ինչպես յուրաքանչյուր մրցման, այստեղ էլ շատ լավ պատրաստվել էինք, աշխատել: Բավականություն է պատճառում այն աշխատանքը, որ վերջնական արդյունքը լինում է գոհացուցիչ առաջին հերթին մարզիչների համար: Մեր թիմն ուժեղ է: Հուսամ՝ մենք շատ ավելի մեծ բարձունքների ենք հասնելու»,– ասաց նա:
Մարզիկը վստահեցրեց` իրենց նաև ոգևորել է այն հանգամանքը, որ մեծահասակների Եվրոպայի առաջնությունից առաջ երիտասարդներն էին Թուրքիայում շատ լավ մասնակցել:
Հակոբ Սերոբյանի գլխավորած հավաքականը Եվրոպայի առաջնությունում պայքարն ավարտել է 3 մեդալով` 1 ոսկե, 1 արծաթե և 1 բրոնզե: