ԵՐԵՎԱՆ, 15 ապրիլի - Sputnik. Երևանի Կենտրոն վարչական շրջանի նախկին ղեկավարը Վիկտոր Մնացականյանը կմասնակցի Երևանի ավագանու ընտրություններին։ Այս մասին նա գրել է իր ֆեյսբուքյան էջում։
«Սիրելի երևանցիներ, ընկերներ ու համաքաղաքացիներ, համոզված եմ` գիտեք, որ իմ երազանքները կապված են Երևանի հետ։ Շուտով կհայտարարվեն Երևանի ավագանու ընտրությունները, և ուզում եմ ինձ և մեր մասնագետների թիմին մաղթեք հաջողություն առաջիկա ընտրություններում»,– գրել է նա։
Նշենք, որ 2019 թվականի հոկտեմբերի 19-ին Վիկտոր Մնացականյանը Facebook-ում գրառում էր արել ու հայտարարել թաղապետի պաշտոնից հրաժարվելու մասին։ Նա նշել էր, որ իր որոշումը քաղաքական ենթատեքստ չունի, այլ պայմանավորված է քաղաքին ու երկրին ավելի շատ օգուտ տալու ցանկությամբ։
Ավելի ուշ մամուլը գրել էր, որ նրա հրաժարականը կարող է կապված լինել ՀՀ 3–րդ նախագահ Սերժ Սարգսյանի փեսա ու Մնացականյանի կնքահայր Միքայել Մինասյանի քաղաքական հայտարարությունների հետ։
Հիշեցնենք, որ Երևանի 13-րդ քաղաքապետ Հրաչյա Սարգսյանը հրաժարականի դիմում է ներկայացրել 2023թ–ի մարտի 17–ին։ Պաշտոնից հեռանալու մասին Սարգսյանն անձամբ հայտնել էր ավագանու արտահերթ նիստի ժամանակ։
Երևանի ավագանու ընտրությունները նախատեսված են 2023 թվականին։ «Քաղաքացիական պայմանագիր» կուսակցությունը մարտի 31-ին հայտարարեց, որ Երևանի ավագանու ընտրություններում առաջադրելու է Տիգրան Ավինյանի թեկնածությունը։ Սեպտեմբերի 23-ին նա Երևանի փոխքաղաքապետ ընտրվեց։
Ընտրություններին կմասնակցեն նաև գործարար Տիգրան Արզաքանցյանի կինը՝ ազգությամբ ռուս Նատալյա Ռոտենբերգը, որը վերջերս է Հայաստանի քաղաքացիություն ստացել, երգիչ Ռուբեն Հախվերդյանը և «Լույս» խմբակցության ղեկավար Դավիթ Խաժակյանը։
Քաղաքապետի պաշտոնի համար կպայքարի նաև «Ազգային առաջընթաց» կուսակցությունը, որի ցուցակը կգլխավորի վարչության անդամ Հայկ Գրիգորյանը։
ԱԺ նախկին պատգամավոր, ԱԱԾ նախկին ղեկավար, «Հայրենիք» կուսակցության նախագահ Արթուր Վանեցյանը չի բացառել, որ կառաջադրի իր թեկնածությունը Երևանի քաղաքապետի ընտրություններում։