ԵՐԵՎԱՆ, 14 ապրիլի – Sputnik. 44-օրյա պատերազմում զոհված զինծառայողների ծնողներն ու հարազատները գիշերել են քննչական կոմիտեի առջև. երեկ երեկոյից փակ է նաև Մամիկոնյանց փողոցը։
44-օրյա պատերազմում զոհված զինծառայողների ծնողներն ու հարազատների բողոքի ակցիան ՀՀ քննչական կոմիտեի մոտ
© Sputnik / Aram Nersesyan
Հայտնել էինք, որ երեկվանից ծնողները ՔԿ–ի առջև 24 ժամով նստացույց են սկսել։ Նրանք պահանջում են, որ պատժեն Եռաբլուրից իրենց բերման ենթարկած ոստիկաններին։ 2022 թվականի սեպտեմբերի 21-ին՝ ՀՀ Անկախության օրը, զոհված զինծառայողների ծնողները Եռաբլուր պանթեոն էին գնացել, որպեսզի արգելեն ՀՀ վարչապետ Նիկոլ Փաշինյանին մոտենալ իրենց որդիների շիրիմներին։ Ոստիկանության աշխատակիցները ծնողների մի մասին բերման էին ենթարկել։ Դեպքով քրգործ էր հարուցվել։
44-օրյա պատերազմում զոհված Հակոբ Ռոստոմյանի հայրը` Արա Ռոստոմյանը, լրագրողների հետ զրույցում հայտարարեց, որ իրենց հիմնական պատճառը ՔԿգալու այն է, որ տեղեկություններ իմանան քրեական գործի մասին։
«Փորձը ցույց է տալիս, որ եթե մենք չենք գալիս ՔԿ, գործն ամբողջովին «քնեցնում են»։ Միայն մեր բողոքից հետո էին ոստիկաններին կանչում հարցաքննության, առերեսումներ էին կազմակերպում»,–ասաց նա։
Ռոստոմյանի խոսքով` իրենք միջնորդություն էինք ներկայացրել դատարան, որպեսզի չեզոք մարդկանց` միջադեպին ներկա լրագրողներին, կանչեն առերեսման ոստիկանների հետ, որպեսզի հասկանալի լինի, թե կողմերից որն է պատկերն ամբողջությամբ ներկայացնում։
Արա Ռոստոմյան
© Sputnik / Aram Nersesyan
«Մենք ներկայացնում ենք, որ ոստիկանների օրինական պահանջ չի եղել, և ամբողջը տեսանկարահանված է։ Լրագրողներից 2 –ին են կանչել առերեսման։ Մենք տեղեկություն ունենք, թե իբր չեն կարողանում մյուս լրագրողներին գտնել։ Դա պատրվակ է, որպեսզի նորից գործը ձգձգեն»,–ասաց զոհվածի հայրը։
44-օրյա պատերազմում զոհված զինծառայողների ծնողներն ու հարազատների բողոքի ակցիան ՀՀ քննչական կոմիտեի մոտ
© Sputnik / Aram Nersesyan
Ծնողների խոսքով` անգամ ոստիկաններին նույնականացնելու համար իրենք լուսանկարները տպել, տարել են ՔԿ։
«Ապացուցված է, որ ոստիկաններից 13–ը ծնողների հանդեպ բիրտ ուժ են կիրառել։ Ծնողներից 5–ը տարբեր մարմնական վնասվածքներ են ստացել ։ Այդ ոստիկաններն առերեսումների ժամանակ ընդունել են իրենց մեղքը, ներողություն են խնդրել ծնողներից։ Կարմիր բերետավորների գումարտակի ղեկավարը ևս առերեսումների ժամանակ ներողություն է խնդրել և ասել, որ ինքն է նման հրաման տվել։ Այսինքն ավելի քան պարզ է, որ գոնե այդ 13 ոստիկաններին պետք է մեղադրանք առաջադրվեր, մենք զգայինք, որ օրենքը գործում է»,–ասաց Արա Ռոստոմյանը։
Ծնողներին հասած տեղեկություններով` ՀՀ քննչական կոմիտեի նախագահ Արգիշտի Քյարամյանը շենքում չէ։ Նա երեկ ոստիկանների ուղեկցությամբ հեռացել է շենքից ու մինչև հիմա չի վերադարձել։
ՔԿ–ից ծնողներին փոխանցել են, որ խիստ ծանրաբեռնված են և չեն կարող իջնել և նրանց հարցերին պատասխանել։
44-օրյա պատերազմում զոհված զինծառայողների ծնողներն ու հարազատների բողոքի ակցիան ՀՀ քննչական կոմիտեի մոտ
© Sputnik / Aram Nersesyan
Եթե 24 ժամը լրանալուց հետո ոստիկաններին մեղադրանք չառաջադրվի, այսօր 15.00–ին ծնողները հանդես կգան հայտարարությամբ։