ԵՐԵՎԱՆ, 12 ապրիլի – Sputnik. Լեռնային Ղարաբաղի Ասկերանի շրջանում ռուսական խաղաղապահ զորակազմի կողմից հրադադարի ռեժիմի չորս խախտում է արձանագրվել: Այս մասին ասվում է Ռուսաստանի պաշտպանության նախարարության տեղեկագրում։
«Ասկերանի շրջանում արձանագրվել է հրադադարի ռեժիմի չորս խախտում։ Տուժածներ չկան։ Ռուսական խաղաղապահ զորակազմի հրամանատարությունը, ադրբեջանական և հայկական կողմերի հետ համատեղ, տվյալ փաստերի վերաբերյալ քննություն է անցկացնում»,-ասված է հաղորդագրության մեջ։
Նշվում է, որ երեսուն դիտակետերում ռուս խաղաղապահների կողմից իրականացվում է իրադրության շուրջօրյա դիտարկում և հրադադարի ռեժիմի պահպանման վերահսկողություն:
Պարեկություն է իրականացվել երեք երթուղիներով՝ Մարտակերտի, Մարտունու և Շուշիի շրջաններում։
Ռուս խաղաղապահներն ապահովել են մարդասիրական բեռով ավտոմոբիլային շարասյան ուղեկցումը Գորիս-Ստեփանակերտ երթուղով։
Նշվում է, որ ռուս խաղաղապահների անվտանգությունն ապահովելու և հնարավոր միջադեպերը կանխելու նպատակով շարունակական փոխգործակցություն է պահպանվում Ադրբեջանի և Հայաստանի զինված ուժերի գլխավոր շտաբերի հետ: