ԵՐԵՎԱՆ,12 ապրիլի – Sputnik. Հայաստանի և Ադրբեջանի գործընկերներն ընդունել են խաղաղության պայմանագրի շուրջ երկկողմ բանակցությունների հերթական փուլ անցկացնելու վերաբերյալ Ռուսաստանի առաջարկը։ Այսօր ճեպազրույցի ժամանակ այս հայտարարությունն է արել ՌԴ ԱԳՆ պաշտոնական ներկայացուցիչ Մարիա Զախարովան։
Նրա խոսքով՝ Ռուսաստանը ջանքերը չի թուլացնում Ադրբեջանի Հանրապետության ու Հայաստանի Հանրապետության միջև խաղաղության պայմանագրի նախապատրաստման հարցում աջակցություն ցուցաբերելու համար։
«Գործընկերներն ընդունել են մեր տարածքում երկկողմ բանակցությունների հերթական փուլն անցկացնելու մեր առաջարկը։ Ամսաթվի մասին մենք կտեղեկացնենք, երբ այդ ամենը վերջնականապես կհամաձայնեցվի և երբ կկարողանանք հրապարակել այդ տեղեկությունը»,- ասել Է Զախարովան։
Հիշեցնենք` 2021 թվականին Ադրբեջանի նախագահ Իլհամ Ալիևը հայտարարեց, որ պատրաստ է Հայաստանի հետ խաղաղության պայմանագիր ստորագրել։
Մարտի 24-ին Հայաստանի արտգործնախարար Արարատ Միրզոյանը հայտնեց, որ ադրբեջանական կողմը խաղաղության պայմանագրի վերաբերյալ 4 փաստաթուղթ է ներկայացրել, հայկական կողմը` 3։ Վերջին փաստաթուղթը Հայաստանը ստացել է, բայց դեռ արձագանքը չի ձևակերպել։
Ավելի վաղ ՀՀ վարչապետ Նիկոլ Փաշինյանը հայտարարել էր, որ Երևանը Բաքվի հերթական առաջարկների վերաբերյալ իր դիտարկումները կներկայացնի շուտով: