Թմրանյութից ու ալկոհոլից կախվածության դեպքերը հայ երիտասարդների շրջանում ավելացել են։ Այս մասին Sputnik Արմենիայի «Առանց տաբուների» հաղորդմանը խոսեց Կախվածությունների բուժման ազգային կենտրոնի տնօրեն Սուրեն Նազինյանը։
Նա նկատեց, որ ալկոհոլային կախվածությունից բուժման համար դիմում են հիմնականում 35-40 տարեկանից բարձր մարդիկ, իսկ թմրամոլությունից հիմնականում բուժվում են երիտասարդները։ Դա պայմանավորված է նրանով, որ մարդը թմրամիջոցներից ավելի արագ է ընկնում կախվածության մեջ՝ անգամ մեկ օգտագործումը բավական է։ Իսկ ալկոհոլից կախվածություն ձեռք բերելու համար կանոնավոր օգտագործման տարիներ են պետք։
Մասնագետը հայտնեց նաև, որ կենտրոնի թմրամոլների ճնշող մեծամասնությունը(95%) տղամարդիկ են, սակայն վերջին տարիներին բացասական միտում է նկատվում նաև կանանց շրջանում: Այնուամենայնիվ, Նազինյանը համոզված է, որ տղամարդկանց և կանանց մոտ դրդապատճառները տարբեր են։
Եթե տղամարդը հաճույքներ փնտրելով է սկսում թմրանյութեր օգտագործել և կախվածության մեջ է ընկնում, ապա կանայք ընդհակառակը՝ թմրանյութ օգտագործում են ընկճվածության և իրականությունից փախչելու համար:
Կենտրոնի տնօրենը բացատրեց, թե ինչպես ուղղորդել կախվածություն ունեցող մարդուն մասնագիտացված հաստատություն, ասաց, թե որքան կարող է տևել կախվածության հաղթահարումը և ինչպես բացահայտել դեռահասի մոտ թմրանյութային կախվածությունը։ Այս և այլ թեմաների շուրջ ավելի մանրամասն` տեսանյութում։