ԵՐԵՎԱՆ, 7 ապրիլի – Sputnik. ՌԴ-ն կասկած չունի, որ ԱՄՆ-ն և ՆԱՏՕ-ն ներգրավված են հակամարտության մեջ։ Ինչպես հայտնում է ՌԻԱ Նովոստին, այս հայտարարությունն արել է Ռուսաստանի նախագահի մամուլի քարտուղար Դմիտրի Պեսկովը՝ պատասխանելով Ուկրաինայի վերաբերյալ գաղտնի փաստաթղթերի արտահոսքին վերաբերող հարցին։
Ավելի վաղ ամերիկյան «New York Times» թերթը հայտնել էր, որ Պենտագոնը պարզում է, թե ինչպես են սոցիալական ցանցերում հայտնվել այն նյութերը, որոնցում նկարագրվում են ուկրաինական զորքերի վիճակը և դրանց ամրապնդմանն ուղղված ԱՄՆ-ի ու ՆԱՏՕ-ի ծրագրերը: Պարբերականը նշել էր, որ փաստաթղթերը, որոնք թվագրվում են մարտի սկզբով, իբր տարածվում են ռուսական իշխանամետ Telegram-յան ալիքներում։
«Մենք նույնիսկ աննշան կասկածներ չունենք ռուս–ուկրաինական հակամարտության մեջ ԱՄՆ-ի և ՆԱՏՕ-ի ուղղակի կամ անուղղակի ներգրավվածության հարցում»,- ասել է Պեսկովը ամերիկյան CNN հեռուստաալիքին:
Նա նշել է, որ այդ ներգրավվածության մակարդակն աստիճանաբար աճում է, և Մոսկվան հետևում է այդ գործընթացին։
«Դե իհարկե, դա բարդացնում է ամբողջ պատմությունը, բայց դա չի ազդի հատուկ գործողության արդյունքի վրա»,-հավելել է Պեսկովը:
Հիշեցնենք՝ 2022 թ. փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են մինչ օրս։