ԵՐԵՎԱՆ, 7 ապրիլի - Sputnik. Թուրքիայի և Իրանի նախագահներ Ռեջեփ Թայիփ Էրդողանն ու Իբրահիմ Ռայիսին հեռախոսով քննարկել են իրավիճակը տարածաշրջանում, հայտնում է թուրքական Daily Sabah պարբերականը:
Նշվում է, որ երկու երկրների նախագահները խոսել են Երուսաղեմի Ալ-Աքսա մզկիթում Իսրայելի ուժային գործողությունների, ինչպես նաև Գազայի հատվածին և հարավային Լիբանանին հասցված հարվածների մասին:
Ըստ թուրքական պարբերականի՝ Էրդողանն ընդգծել է «խելամիտ մոտեցման» անհրաժեշտությունը Պաղեստինում էսկալացիայի նոր փուլը կանխելու համար։ Նա իրանցի գործընկերոջը կոչ է արել ուժեղացնել փոխգործակցությունը Իսլամական համագործակցության կազմակերպության և ՄԱԿ-ի միջոցով:
Թերթը հիշեցնում է, որ Ռայիսիի այցն Անկարա երկու անգամ հետաձգվել էր․ առաջին անգամ պատճառները չէին նշվել, երկրորդ անգամ՝ Թուրքիայում տեղի ունեցած երկրաշարժի պատճառով:
Անկարան և Թեհրանը տարաձայնություններ ունեն մի շարք հարցերի վերաբերյալ, այդ թվում՝ Սիրիայում տիրող իրավիճակի շուրջ՝ «հաշվի առնելով Իրանի ռազմական աջակցությունը Բաշար Ասադի կառավարությանը»: Այնուամենայնիվ, ինչպես գրում է պարբերականը, վերջին շփումները հանգեցրել են հարաբերություններում «դրական միտումների», և Թեհրանը բացահայտ աջակցում է Դամասկոսի և Անկարայի միջև ջերմացմանը:
Ավելի վաղ հայտնի էր դարձել, որ ապրիլի 5-ի գիշերը տասնյակ պաղեստինցիներ են տուժել Երուսաղեմի Ալ-Աքսա մզկիթում իսրայելցի ուժայինների հետ բախումների ժամանակ: Իսրայելի ոստիկանությունը հայտարարել էր, որ Ալ-Աքսայում իրականացված ռեյդի արդյունքում ձերբակալվել է 350 մարդ: Իսրայելի գործողություններն արդեն դատապարտել են Հորդանանը, Եգիպտոսը, Իրանը, Թուրքիան։
Իսրայելական կործանիչներն ու տանկերը նույն գիշերը հարվածներ են հասցրել Գազայի հատվածում գտնվող ՀԱՄԱՍ արմատական շարժման օբյեկտներին՝ ի պատասխան Իսրայելի տարածքի վրա հրթիռների արձակմանը: Ապրիլի 6-ին Իսրայելը հարվածներ է հասցրել նաև Լիբանանի հարավին, թիրախ են դարձել ՀԱՄԱՍ-ի ենթակառուցվածքները։