ԵՐԵՎԱՆ, 6 ապրիլի – Sputnik. Հայաստանի զինվորականները մասնակցելու են Եվրոպայում ԱՄՆ հովանու ներքո անցկացվելիք Defender-23 («Պաշտպան-23») զորավարժություններին։ Տեղեկությունը հայտնել է Պենտագոնի խոսնակի տեղակալ Սաբրինա Սինգհը։
Ապրիլին կայանալիք զորավարժություններին մասնակցելու է մոտ 9000 ամերիկացի և մոտ 17 000 օտարերկրացի զինծառայող՝ 26 դաշնակից և գործընկեր երկրից. զորավարժությունների մի մասն անցկացվելու է եվրոպական 10 երկրում։
Բացի ԱՄՆ-ից, «Defender-23»–ին մասնակցելու են զինվորականներ Հայաստանից, Վրաստանից, Ալբանիայից, Բոսնիա և Հերցեգովինայից, Բուլղարիայից, Խորվաթիայից, Չեխիայից, Դանիայից, Էստոնիայից, Ֆրանսիայից, Գերմանիայից, Հունաստանից, Հունգարիայից, Իտալիայից, Կոսովոյից, Մոլդովայից, Չեռնոգորիայից, Նիդեռլանդներից, Հյուսիսային Մակեդոնիա, Լեհաստան, Ռումինիա, Սլովենիա, Իսպանիա, Շվեդիա և Մեծ Բրիտանիա:
«Սրանք ամենամյա, գրեթե 2 ամիս տևողությամբ զորավարժություններ են, որոնք կենտրոնանում են ԱՄՆ-ում գտնվող ուժերի ռազմավարական տեղակայման, նախապես տեղակայված պաշարների օգտագործման և եվրոպական դաշնակիցների և գործընկերների հետ փոխգործունակության խնդիրների վրա», - ասել է Սինգհը։
Նա հայտնել է, որ զորավարժությունները կոչված են ցույց տալու ամերիկյան բանակի` մարտունակ զորքերը և տեխնիկան արագ տեղակայելու կարողությունը, որպեսզի վստահեցնեն դաշնակիցներին, զսպեն նրանց, ովքեր սպառնում են Եվրոպայի խաղաղությանը, պաշտպանեն մայրցամաքը ագրեսիայից:
«Defender-23» զորավարժությունների ընթացքում կօգտագործվի մոտ 13 000 միավոր տեխնիկա՝ վերցված նախապես ստեղծված պաշարներից։
Նշենք, որ ՀՀ պաշտպանության նախարարությունը դեռ չի հաստատել իր մասնակցությունն այս զորավարժություններին։