Ապրիլի 4-ին Մանհեթենի քրեական դատարանում ԱՄՆ նախկին նախագահ Դոնալդ Թրամփին մեղադրանք է առաջադրվել 34 դրվագով: Նրան մեղադրում են փաստաթղթեր կեղծելու և հանցագործությունը թաքցնելու փորձի մեջ։ Մեղադրանքների համակցությամբ նրան մինչև 136 տարվա ազատազրկում է սպառնում։ Մինչ ընթերցվում էր մեղադրանքը, շրջանային դատախազության շենքի մոտ զուգահեռաբար երկու ակցիա է անցկացվել՝ ի պաշտպանություն Թրամփի և ընդդեմ նրա։
Հիմնական մեղադրանքը Թրամփի խորհրդական Մայքլ Քոենի կողմից պոռնոդերասանուհի Սթորմի Դենիելսի փաստաբանին իբր 130 հազար դոլար վճարելն է՝ քաղաքական գործչի հետ նրա ինտիմ կապի մասին լռելու համար: Դատախազության կարծիքով՝ այդ կերպ նա փորձել է ազդել 2016 թվականի ընտրությունների վրա։
Մեղադրող կողմը նաև պնդում է, որ American Media Inc. ընկերությունը իբր 30 հազար դոլար է վճարել Trump Tower-ի նախկին դռնապանին, որը պնդում էր, որ տեղեկություններ ունի Թրամփի արտամուսնական երեխայի մասին։ Նույն ընկերությունը, դատախազության վարկածով, 150 հազար դոլար է վճարել մի կնոջ, որը պնդում էր, որ Թրամփի հետ սեռական հարաբերություններ է ունեցել:
Որոշ վերլուծաբանների կարծիքով, այս դատավարությունը նախաձեռնողների նպատակն է խանգարել Թրամփին հաղթել ընտրություններում: Այսինքն՝ շեղել նրան լիարժեք ընտրարշավ անցկացնելուց, քանի որ դատավարությունը կարող է տևել մի ամբողջ տարի։
ԱՄՆ նախկին նախագահ Դոնալդ Թրամփի քրեական հետապնդումը կարող է նրան կշիռ հաղորդել Հանրապետական կուսակցության ընտրազանգվածի աչքում, սակայն ընտրություններում ավելի կարևոր են անկախ ընտրողների ձայները, իսկ նրանց արձագանքը դատավարությանը դժվար է կանխատեսել:
ԱՄՆ պատմության մեջ առաջին անգամ նախկին նախագահին մեղադրանք է առաջադրվել քրեական իրավախախտման համար և նա ձերբակալվել է, թեկուզ մի քանի ժամով: Կալանքը վերացնելուց հետո Թրամփը վերադարձել է Ֆլորիդայի Փալմ Բիչում գտնվող իր տուն: