ԵՐԵՎԱՆ, 4 ապրիլի – Sputnik. Այս օրերի ընթացքում Ադրբեջանը փորձել է խախտել Հայաստանի սահմանը տարբեր հատվածներում, բայց գյուղի բնակիչները կարողացել են առանց բանակի միջամտության կանխել այդ ցանկությունը։ Հանրային հեռուստաընկերության եթերում այս հայտարարությունն արեց ԱԺ «Քաղաքացիական պայմանագիր» խմբակցության պատգամավոր, 44-օրյա պատերազմի հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանը։
«Մեր գյուղերի բնակիչներն իրենց ուժերով այս պահի դրությամբ կարողանում են իրենց իրավունքները իրացնել տվյալ տարածքների նկատմամբ»,– ասաց նա։
Քոչարյանի խոսքով` թե՛ ԱԱԾ սահմանապահ զորքերը, թե՛ ՊՆ հակահետախուզությունը երեկվա դրությամբ ունեն արձանագրված իրողություններ, որոնց մասին վաղը կլինի հստակ տեղեկատվություն։
«Սա կարձանագրի նոր իրավիճակ, ենթադրում եմ`բարենպաստ իրավիճակ, իսկ դա նշանակում է, որ մենք պետք է տեր լինենք այն ամենին, ինչը մերն է»,– հավելեց նա։
Ճշտող հարցին` հայկական կողմն այնուամենայնիվ դիրքերը բարելավել է, թե կորցրել, Քոչարյանը պատասխանեց. «Այդ հարցը անընդհատ հրմշտոցի մեջ է լինելու, քանի դեռ չի լուծվել սահմանազատման և սահմանագծման հարցը»։
Նա չհերքեց, որ երկու օր առաջ ադրբեջանական կողմը 100-150 մետր առաջ է եկել դեպի ՀՀ ինքնիշխան տարածք։
Հարցին, թե վերադարձե՞լ են արդյոք իրենց ելման դիրք, պատգամավորը պատասխանեց. «Չեմ կարող ասել, եթե վաղը այդ հարցը տայիք, կպատասխանեի»։
Հիշեցնենք` ՀՀ ազգային անվտանգության ծառայությունը մարտի 30-ին հայտնեց, որ ադրբեջանական կողմը կրկին խախտել է պայմանավորվածությունները և մի քանի կետերում տեղակայվել սահմանից 100-300 մետր ավելի առաջ, որոշ տեղերում ադրբեջանական կողմը, չսպասելով նախապես պայմանավորված ճշգրտումներին, սկսել է դիրքավորվել և իրականացնել ինժեներական աշխատանքներ:
ՀՀ ԱԱԾ–ն ապրիլի 1-ին հայտարարեց, որ Տեղ-Կոռնիձոր հատվածում հանդիպում է տեղի ունեցել Հայաստանի և Ադրբեջանի ներկայացուցիչների մասնակցությամբ, և իրականացվել սահմանի ճշգրտման աշխատանքներ, որի արդյունքում տվյալ հատվածում իրավիճակը էականորեն բարելավվել է։