ՌԴ ՆԳՆ հրապարակել է ռազմական թղթակից Վլադլեն Թաթարսկու սպանության մեջ կասկածվող Դարյա Տրեպովայի հարցաքննության տեսանյութը։
ՌԻԱ Նովոստին, հղում անելով ՌԴ ՆԳՆ պաշտոնական ներկայացուցիչ Իրինա Վոլկին, հայտնում է, որ Տրեպովային ձերբակալել են իր վարձակալած բնակարանում։
«Սանկտ Պետերբուրգում իրականացրած օպերատիվ-հետախուզական միջոցառումների արդյունքում ոստիկանության աշխատակիցները ՌԴ ԱԴԾ վարչության գործընկերների հետ ձերբակալել են Դարյա Տրեպովային, որը կասկածվում է Ունիվերսիտետսկի 25 փողոցի վրա գտնվող սրճարանի պայթյունին առնչություն ունենալու մեջ. պայթյունի հետևանքով մահացել է ռազմական թղթակից Վլադլեն Թաթարսկին», – ասել է նա։
Նշվում է, որ այժմ ձերբակալվածի հետ դատավարական գործողություններ են ընթանում։
Տեսանյութում ձերբակալվածը խոստովանում է, որ արձանիկ է բերել, որը հետագայում պայթել է։
Հարցին, թե ո՞վ է իրեն փոխանցել արձանիկը, Տրեպովան խնդրել է ավելի ուշ պատմել այդ մասին։
Երեկ Սանկտ Պետերբուրգի կենտրոնում գտնվող սրճարաններից մեկում պայթուցիկ սարք է գործարկվել, որի հետևանքով մահացել է ռազմական թղթակից Վլադլեն Թաթարսկին։
ՌԻԱ Նովոստիին գրել էր, որ պայթուցիկ սարքը, նախնական տվյալներով, բերել է սրճարանի այցելուներից մեկը` Դարյա Տրեպովան։ Տուփում, որն աղջիկը փոխանցել է Թաթարսկուն, արձանիկ է եղել։
ՌԴ քննչական կոմիտեն քրեական գործ է հարուցել համընդհանուր վտանգ ներկայացնող եղանակով սպանության մասին հոդվածով (ՌԴ ՔՕ 105–րդ հոդված մաս 2)։
Հակաահաբեկչական ազգային կոմիտեն հայտարարել է, որ Թաթարսկու սպանությունը ծրագրել են Ուկրաինայի հատուկ ծառայությունները` Կոռուպցիայի դեմ պայքարի հիմնադրամի* համախոհների ներգրավմամբ։
Ավելի վաղ Sputnik ռադիոկայանը հայտնել էր, թե ինչ հայտարարություն է արել Վլադլեն Թաթարսկու սպանության վերաբերյալ Դարյա Տրեպովայի ամուսինը։
* ՌԴ–ում օտարերկրյա գործակալ ճանաչված և որպես ծայրահեղական արգելված կազմակերպություն։