ԵՐԵՎԱՆ, 31 մարտի – Sputnik. ԱՄՆ նախկին նախագահ Դոնալդ Թրամփին ձեռնաշղթաներ չեն հագցնի դատարան ներկայանալու ժամանակ, որտեղ նրան մեղադրանք է առաջադրվելու։ Այս մասին այսօր հայտարարել է քաղաքական գործչի փաստաբան Ջո Տակոպինան։
«Նախագահին ձեռնաշղթաներ չեն անցկացնի։ Համոզված եմ, որ իրենք կփորձեն այս իրավիճակն առավելագույնս հանրայնացնել», – ABC հեռուստաալիքի հետ զրույցում ասել է Տակոպինան։
Նա նաև հավելել է, որ իրավապահները, հավանաբար, կշրջափակեն Նյու Յորքի դատարանի շենքին հարող թաղամասը։
Սպասվում է, որ Թրամփը դատարան կներկայանա ապրիլի 4-ին։
Նշենք, որ ավելի վաղ Նյու Յորքի երդվյալ ատենակալ մեծ ժյուրին քվեարկել է Թրամփին մեղադրանք առաջադրելու օգտին։ CNN–ի աղբյուրների տվյալներով` Մանհեթենի դատախազությունը ԱՄՆ նախկին նախագահին մեղադրում է ավելի քան 30 դրվագներով` կապված գործարար ոլորտում իրականացրած խարդախությունների հետ։ Պաշտոնապես մեղադրանքները կհրապարակվեն միայն դատարան Թրամփի ներկայանալու ժամանակ։
Թրամփը հայտարարել էր նաև, որ հետապնդումը զուտ քաղաքական բնույթ է կրում և կապված է 2024 թվականին նախագահի պաշտոնի համար պայքարելու նրա մտադրության հետ։