ԵՐԵՎԱՆ, 30 մարտի – Sputnik. Հայաստանի որոշ բնակավայրերում ձյուն է տեղում։ ՆԳՆ փրկարար ծառայության լրատվության բաժինը հայտնում է, որ 22։00-ի դրությամբ` ձյուն է տեղում Գյումրի, Ճամբարակ, Գավառ, Ստեփանավան քաղաքներում։ Աշոցքի տարածաշրջանի ավտոճանապարհներին ոչ միայն ձյուն է տեղում, այլև տեղ-տեղ առկա է մերկասառույց:
Նշված ժամի դրությամբ հանրապետությունում կան փակ ավտոճանապարհներ։ Մասնավորապես, ՆԳՆ փրկարար ծառայության տեղեկություններով` փակ են Արագածոտնի մարզում «Ամբերդ» բարձր լեռնային օդերևութաբանական կայանից դեպի Ամբերդ ամրոց և Քարի լիճ տանող ավտոճանապարհները։
Գերատեսչությունից վարորդներին խորհուրդ են տալիս երթևեկել բացառապես ձմեռային անվադողերով։
ՌԴ–ում ՀՀ դեսպանատան մաքսային կցորդ Վահան Հակոբյանն էլ Sputnik Արմենիային հայտնում է, որ Վերին Լարսի անցակետը և Խաչի լեռնանցքը երկու ուղղություններով բաց են բոլոր տեսակի տրանսպորտային միջոցների համար: