ԵՐԵՎԱՆ, 27 մարտի – Sputnik. Հեռու չէ գաղափարի իրագործումը, որ առաջիկա տարիներին Հայաստանի և Իրանի միջև առևտրաշրջանառությունը 3 միլիարդ դոլարի կհասնի։ Այսօր լրագրողների հետ զրույցում այս հայտարարությունն արեց Հայաստանում Իրանի դեսպան Աբբաս Բադախշան Զոհուրին։
Նշենք, որ Երևանում մեկնարկել է Թավրիզի իսլամական արվեստի համալսարանի 35 ուսանողների և թավրիզցի արվեստագետների ձեռագործ աշխատանքների ցուցահանդես-վաճառքը։
«Իրանն ու Հայաստանը պայմանավորվել են առևտրաշրջանառության ծավալները մեծացնել, և վերջին տարիներին 250 միլիոն դոլարի հասնող առևտրաշրջանառությունը կարողացել ենք 750 միլիոնի հասցնել»,–ասաց դեսպանը։
Նրա խոսքով` բացի այդ, Իրանի և Հայաստանի միջև առկա պատմական կապերը մշակույթի տարբեր ճյուղերում հարաբերությունները զարգացնելու հնարավորություն են տալիս։ Զոհուրին նշեց, որ որպես ժառանգություն Հայաստան-Իրան լավ կապեր են ստացել, սակայն վերջին տարիներին է՛լ ավելի են ակտիվացել Իրանի և ՀՀ–ի միջև տնտեսական, քաղաքական և մշակութային կապերը։ Սակայն, ըստ նրա, դեռևս մեծ բաց կա, քանի որ երկու երկրների բնակիչներն էլ տեղեկացված չեն երկու երկրների մշակույթի որոշ դրվագների։
Տուրիզմի հայկական ֆեդերացիայի նախագահ Մեխակ Ապրեսյանն իր հերթին ասաց, որ միջոցառումը միջմշակութային երկխոսություն է 2 երկրների միջև, ինչպես նաև հնարավորություն երկու երկրների միջև առկա բարեկամական կապերն ամրապնդելու։ Բացի այդ, միջոցառումը հետաքրքիր է նաև տնտեսական ոլորտին. «Սա իրական հնարավորություն է համագործակցության»։
Ապրեսյանը հիշեցրեց, որ օգոստոսի 10-11-ին էլ Սիսիանում կկայանա հայ–իրանական մշակութային խոհանոցային փառատոնը` Նավասարդը։
Ի դեպ, մեկ ամիս անց Թավրիզում կկազմակերպվի հայ ուսանողների և արվեստագետների գործերի ցուցադրություն–վաճառք։
Հիշեցնենք, որ դեռ 2022-ի նոյեմբերին Իրանի նախագահ Էբրահիմ Ռայիսին հայտարարել էր, որ Իրանի նպատակն է Հայաստանի հետ ապրանքաշրջանառությունը հասցնել տարեկան 3 մլրդ դոլարի։